La Usc di Ladins

Con la presidenza de Tone Pollam s'à desfiré la senteda generala d’aisciuda dla UGLD–Union Generela di Ladins dla Dolomites en vender ai 12 de mei 2023 te sia senta storica, tla Cësa di Ladins. Les raprejentanzes dles Unions di Ladins da dutes les valedes y ence dla Comunanza Ladina a Bulsan à tout pert con interes a la tratazion di ponc, anter chisc l’aprovazion di conc per l ann passé per l'Union Generela di Ladins y La Usc di Ladins.

Na aministrazion sana al moment
Sciche vigni organisazion, à ence l’Union Generela di Ladins n bilanz y cont consuntif articulé da mostré su. L personal se roda da plu agn entourn a les diesc–undesc unités, impegné per la maioura pert tl laour per publiché La Usc di Ladins: redadours:es, fraficher:es y aministradours:es. Les speises per dé fora La Usc di Ladins é ence liedes a la organisazion y al mantegniment dles strutures sciche i ofizes con les mascins che và debujen.
"I conc dla Union Generela di Ladins dla Dolomites é da plu agn encà stabiii y sagns", à dit l comerzialist y espert de bilanz aziendal Ludwig Comploj che acompagneia con si stude l’aministrazion. L comerzialist Luis Stuffer, l revisour di conc dla Union Generela di Ladins y consulënt dles coutes, à ajonté da sia pert che les entredes y speises garantesc al moment na gestion sareina di conc.
Nia da vedei de bon uedl n’é la situazion di contribuc da pert dla Region Trentin–Südtirol per les ativités dla Union Generela di Ladins dla Dolomites y per la redazion de La Usc di Ladins via en Souramont: les grovaries burocratiches é truepes, i trois per rové ai contribuc y a la licuidazion de chisc é der sfadiousc y – te val’ caje – sarés ju!

Na odleda al ann passé
L di 7 de mei 2022 ova l’Union Generela di Ladins dla Dolomites adum con la Union di Ladins de Fodom metù a jì a Reba l Di dla Unité Ladina con na meisa torona con joenes y joegn da duc i ciantons ladins, y en ajonta na discuscion con personalités dles vals ladines. Laprò ova l intendent dles scoles ladines dl Südtirol da n iade Roland Verra prejenté l liber "Na Ladinia possibile", dé fora da l’UGLD. Reba é sté al zenter dl’ativité spo ence da d’auton con l festival di cors di mutons "Cianta con nos". La fin de setember se ova Ladines y Ladins abiné a Badia per jì per sanc a Oies y zelebré ilò na santa mëssa ladina. L ann passé fova sté implì de manifestazions ence per l concurs fotografich "Ladinia" y la festa di 50 agn de La Usc di Ladins a La Ila.

Liejede inant de plu tla proscima edizion de La Usc di Ladins (publicazion: en vender ai 19 de mei 2023)!