La Usc di Ladins

Al ê te na classa dla matura cun feter 30 studëntes y studënc, olache i me confortâ dagnora da tigní l’ora de religiun. Ai ê düc dër interessá y porchël nasciôl scialdi ince discusciuns dër sostanzioses. I me sintî propi gonot arichí da chësta ora, deache i studënc dëida dagnora ince da ti insigné val’ al professur. I studënc fej gonot domandes sön argomënc a chi che i ess messü ponsé, mo ne l’á nia fat. So contribut m’á gonot motivé da fá na reflesciun plü sota di problems. Dal mëteman dla ora periâi dagnora cun i studënc.




N de âi metü averda che Robert – n studënt che ê dagnora dër interessé – ne s’â nia fat le sëgn dla crusc. Chësc ne ciarâi pa mai tan avisa, mo en chësc iade m’âl dé al edl, ince sce al ê senté tla ultima ligna. Magari n’âl ma nia metü averda. Mo spo l’ái odü ince pro les ores dedô: al lovâ bel sö por perié, mo ne se fajô nia le sëgn dla crusc. Tlafinada ái tut la dezijiun da baié impara. "I vëighi che al é bele n pez che te ne te fejes nia plü le sëgn dla crusc. T’al desmëntieste o n’oste nia le fá?" Al á respognü cun calma, mo cun convinziun: "I n’ó nia le fá!"

"Spo araste sigü tües bunes rajuns. Podessi savëi ciünes che al é?" Iló m’ál cunté che al â fat na esperiënza nia da crëie.

Al ê cun süa picia so tl salf d’aspeta dla staziun de Bologna, ai 2 d’agost dl 1980. Denanche pié sö zoruch cuntra Porsenú, orôl ciamó telefoné a ciasa por ti al lascé alsavëi a süa uma. Tl salf d’aspeta êl bëgn n telefon publich, mo an ne ciafâ plü degünes monëdes. Insciö ál tut süa so y é jü fora por jí a chirí invalgó i "gettoni". Pornanche ai é stá defora da üsc, ál dé ca na esplojiun spaventosa. La tera tremorâ, döt jorâ por incërch y ala fin messâl baldi ince odëi corps sbregá sö zënza vita, feris che scraiâ do aiüt y indlunch porsones desperades. Na spordüda ti ê jüda cina al os y le spavënt l’â tut ca deplëgn.

"Dailó ái tut la dezijiun da refodé Chël Bel Dî, deache al á lascé pro n te spavënt y n te dolur sön porsones inozëntes". Te chël momënt ne savôi veramënter nia ci che i ess podü ti dí a chësc pros studënt. Canche al á capí che i ne ciafâ degünes parores, él jü inant: "I n’ó plü avëi nia da fá cun n Dî tan cröde y brutal".
"Te n’as gnanca ciamó 20 agn. N’arateste nia che te sides ciamó massa jonn da tó na te dezijiun tan ala snela?"
"No, chësta é la sora dezijiun aciomada."
"N’este pa nia contënt che tö y tüa so sëis ciamó en vita? Cun te l’á Chël Bel Dî minada dër buna, por te ál pö fat n miracul!"
"No, i n’ó nia crëie te n Dî che lascia pro val’ de te sön porsones inozëntes."
La calma te so baié m’á fat gran impresciun, mo i ti á impó ciamó fat na proposta: "Robert, n’oste nia impó ciamó baié cun me?"
"No, i n’ó nia, mo sce Os orëis baié cun me, spo sunsi ion a öna da baié." I l’á damané zoruch: "Da te infora ne sinteste nia le debojëgn?". "No."

Al â tut pert ala ora de religiun cina ala fin dl ann; por respet devers i atri lovâl ince dagnora sö canche al ê da perié, mo ne se fajô nia le sëgn dla crusc. Tratan l’ora se comportâl sciöche dagnora cun gran cherianza. Trënt’agn dedô êl pro na festa. Iö ne l’â nia plü conesciü, mo al m’á fat gran plajëi canche al é gnü pormez a me saludé. I ti ess ion damané co che so raport cun Dî ê deventé, mo ara n’é nia rovada tan inant.
Sce Chël Bel Dî dëida zacai cun n miracul, spo él la porsona salvada che stënta dër da le reconësce – dantadöt sce l’ambiënt incëria mostra la gran forza y la grigna dl mal. Le studënt é resté plü imprescioné dal spavënt di morc y feris, co dala gran scincunda che ti á salvé la vita. Vigni buna opera che i ciafun da Chël Bel Dî nes arjunj gonot canche i sun te n ambiënt dal rî y da orëi crou. Nosc impëgn dess ester chël da rengrazié plü co da incolpé.

Traduziun fora dal liber "Seelsorgliche Erfahrungen in Kirche und Schule – Mit 90 Jahren blickt Josef Granruaz zurück und voraus", 2023