La Usc di Ladins

L aea soscedà n grum de comenc negatives l post publicà sun Facebook ai 24 de aost dal menacrep Fabio Giongo che en chel dì, compagnan n ghest sun Antermoa, sunsom la via ferèda, l aea troà na gran scrita fata col spray neigher sul sas apede la crousc, na scrita contra la presidenta del Consei di Ministres Giorgia Meloni. Giongo l à sobito fat n retrat e l lo à publicà sui social con chela de fèr pissèr sora la jent sul fat grief e sul besegn de respetèr nesc crepes desche ambient. 

La Sociazion Refuges del Trentin aea slarià fora chest messaje desche spenta per tor coscienza sul besegn de defendura de nesc monc. »La politica e la libertà de pensier e de esprescion no fossel più giust che les troe etres lesc de divulgazion?« l’à scrit sun sia piata Facebook.

La jent à tacà a se domanèr con colun sentiment zachei rua fin a passa 3.000 metres con la bomboleta spray te prossach aposta per fèr chela scrita, zenza pissèr al dan che l aessa creà a nesc crepes e al ambient da mont.

I Ciamorces de Fascia se à sobito tout a cher l fat encrescegol e i se à endrezà per jir su a netèr via chela scrita. Coscita en vender al prum de setember n grop de menacrepes à fat la via ferèda da la man ovest e i é rué sunsom la ponta del Ciadenac de Antermoa. »Volon che noscia azion de netijia reste dalonc da ogne orientament politich e volon far a saer che colun che fossa stat l messaje scrit assane fat valif, ence se fossa stat scrit ‘ciao’ – ne à dit l president di Ciamorces Ivan Vian. 

De più su La Usc stampèda de vender ai 8 de setember.  (Monica Cigolla)