La Usc di Ladins

N lunesc ai 18 de setëmber ie l Aiut Alpin unì cherdà de ndut sies iedesc. Danter auter iesen julei sun Plan de Gralba, ulache n ël de 55 ani ie tumà cun la roda batan l cë. N l à  menà tl spedel de Bulsan.
L di do, ai 19 de setëmber, ie l joler dl Aiut Alpin ntëur marënda unì cherdà te Sëlva per na emergënza sanitera.
N mierculdi ai 20 iel stat de ndut cater ntervënc. Danter auter ie la Crëusc Blancia unida adalerch daduman tla sënta dl Aiut Alpin cun n pazient che ova problems al cuer. Do che l dutor l à vijità, ie l pazient unì menà cun l’ambulanza te spedel de Persenon. Domesdì ntëur la cater ie l dutor dl Aiut Alpin inò unì cherdà per n ëila che ova problems al cuer, n ie julei cun l joler a Corvara ulache l’ëila se n stajova ntant per fertuna inò miec y nsci ne n’iel nia stat de bujën de la mené te spedel.
I judacrëp dla Alta Badia ie unii cherdei n sada ai 23 de setëmber ntëur mesa la trëi domesdì per n ntervënt sot a Piz Boè a 2.900 metri. N’ëila olandeja ie tumeda batan l cë y se fajan mel ala cnodla. La ne fova nia plu bona de jì. Davia che l fova scialdi da nibl, ne foven nia segures de vester boni de jì a la tò cun l joler. Nsci ie n judacrëp pià via dala utia de Vallon per arjonjer l’ëila che se ova fat mel. Ma per fertuna à l joler mpo pudù pië via y arjonjer l luech ulache l ie suzedù la desgrazia te puech tëmp, menan pona la seniëura tl spedel de Burnech.
N l medemo di iesen da sëira mo unii cherdei sun Mont de Sëuc. N seniëur dai Paejes Tudësc ova problems de zirculazion, ma do che l dutor dl Aiut Alpin l à vijità a puntin se àn ntendù che l ne fova nia velch de grief y l à nsci pudù resté tl hotel.

Deplù te la edizion dl vender, 29 de setember.