La Usc di Ladins

La pèsc e l desarm, l ruol de la comunicazion e de l’informazion, la oportunitèdes e i risesc de l’inteligenza artifizièla, l empegn a favor di ultimes, la solidarietà, la giustizia, la responsabilità personèla e coletiva. L é vèlch un di argomenc de la neva edizion de Ispirazions d’Istà 2026, endrezèda da la Comiscion per la cultura de la parochies de Fascia, col sostegn de la Diozesa de Trent. Diesc evenc slarié fora te duta la parochies de la val, diesc momenc che sporc encontres, testimonianzes e esperienzes culturèles che entrecia fe, atualità, storia, èrt e enrescida spirituèla. Stories de angern e de anché, esperienzes de vita, percorsc de enrescida, travers la paroles, la musega e l’èrt che doventa ocajions per entener l prejent travers la reijes culturèles e spirituèles, ge dajan sie dret valor al enconter, al dialogh e a la speranza.
»Ogne ispirazion autentica no se sera ite te n pensier – à dit Cesare Bernard, coordenador de la Comiscion parochiala – ma doventa veiada neva su la realtà, enconter con l auter e semenza de speranza per l temp che ne é stat dat da viver. Per chesta neva edizion aon pissà a spazies de confront sui gregn valores de l’esistenza sot la lum del messaje cristian, en sintonia con la enciclica Magnifica Humanitas de Papa Leon XIV, che tel solch de la dotrina soziala de la Gejia, scouta le endesfide de noc temp e la rechiama ‘l doer urgent de restar persone’«.
Te Fascia fora per l istà va inant ence la rassegnes ‘Campo Base’ a Cianacei, ‘Ad alta voce’ a Poza e ‘Moena Incontri’ a Moena.

Podede lejer dut su La Usc stampèda dai 10 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)





 (MCI)