La Usc di Ladins

N nef tassel se jonta apede a la pista per la rodes e per chi che va a pe te Fascia. En mèrtesc ai 14 de november l president de la Provinzia de Trent Maurizio Fugatti l é ruà a Fontanac per consegnèr i lurieres per portèr a compiment l ultim toch de vièl per la rodes che rua fin ta Penìa, lonch 6,5 chilometres. Pel zacan orir l cantier per fenir su chest ultim toch de troi e serèr su na storia longia che à troà sacotenc empedimenc. A chesta vida la perferida per chi che va con la roda o a pe, da Molina a Penìa, rua a 48,134 chilometres. Se perveit che i lurieres rue a compiment per la fin del istà del 2024.

L president Fuagtti à rengrazià i tecnics provinzièi per esser stac prejenc a la consegna di lurieres e l à dit che »canche sarà fenii su i lurieres per chest troi de Fiem e Fascia se podarà pissèr al coleament con Piné.«

A la consegna di lurieres, apede ai raprejentanc de la firma, l era ence l procurador Giuseppe Detomas, i ombolc de Cianacei Giovanni Bernard, de Ciampedel Ivo Bernard e de Mazin Fausto Castelnuovo e l diretor de l’Apt de Fascia Paolo Grigolli. Duc à palesà sodesfazion percheche zacan pel tachèr ite i lurieres per n troi per la rodes dassen spetà te Fascia soraldut dai sacotenc turisć d’istà. I ge à domanà ence che l toch che l é jà vegne slarià e vegne spartì i spazies per chi che va con la roda e per chi che va a pe, ajache l é pericolous e sozede semper più de spes azidenc.

De più su La Usc stampèda de vender ai 24 de november.  (Monica Cigolla)