La Usc di Ladins

En lunesc ai 20 de november l é ruà a la redazion de La Usc di Ladins, da man del president de la Sociazion Fassa Armando Mich, la domana de retifichèr e de me scusèr per doi articoi publiché a mia firma sun chest sfoi tel ultim meis, avisa ai 21 de otober e ai 2 de november passé.

En particolèr tel articol online dai 21 de otober sui fac de vandalism sozedui te la cortina de Sèn Jan, vegn metù en discuscion l fat che sie stat scrit: »Podessa esser defat che la azion di vandai no sie stata fata a na vida casuala, ma mirèda, dalajà che l é stat roinà fosses chiò e lo, no vejines, e anter chestes tant la fossa di genitores che chela del père de legn de Andrea Weiss, candidat a la litazions de chesta domenia te una de la doi listes che se met dant te Fascia.«

Amò la Sociazion Fassa conscidra ofensif ence mie articol en cont de la demiscions de Andrea Weiss da president del Comitat Gregn Evenc, olache scrive: »L president Andrea Weiss no l va più ben. La rejon? La é prest dita: l se à candidà a la ultima litazions provinzièles con la lista ‘Fascegn’, e a Trent, al assessor al turism ‘in pectore’ Roberto Failoni chest no cogn ge aer fat piajer.«

En resposta a la domana de retifica fae chesta prezisazions
Per chel che vèrda l articol sul valdalism a Sèn Jan, anter la desvaliva ipoteses toutes dant al scomenz, canche la bonora dai 21 de otober son jita te cortina, l era ence n possibol leam con la litazions. La retifica sun chest é jà stata publichèda ai 30 de otober, canche i carabinieres à fat a saer i ejic de sia enrescides, dijan che »tedò chel at vandalich no l é rejons leèdes a satanism e nience a odie o discriminazion de religion o a tica contra vèlch persona en particolèr, ma l raptus de na persona che à problemes de sanità mentala.«

Per chel che vèrda la demiscions de Andrea Weiss, che l referiment al assessor Failoni no aessa fondament me é stat dit dal medemo Failoni, che l me aea chiamà al telefon sobito do esser stat avisà del articol metù online ai 2 de november, ma a mia domana se l volea che vegne publicà na sia replica l me aea responet de no. Enveze che la demiscions de Weiss sie vegnudes dal fat che sia encèria é stata metuda en discuscion per via de sia candidatura a la ultima litazions provinzièles l é stat confermà ence te la posizion di impiantisć publichèda online chisc dis passé: »n debatit daite di consorzies su la oportunità che l President del ent tanche metù su ‘Val de Fascia Gregn Evenc’ prejentasse sia candidatura politica a la provinzièles.«

Voi ence sotrissèr che te nesciun de chisc doi articoi la Sociazion Fassa é mai stata nominèda.  (Lucia Gross)