La Usc di Ladins

Sun envit di euro­parlamentars Herbert Dorfmann y Loránt Vince (co­president dl grup de laour) à l prof. Paul Videsott (unibz/SVI) prejenté ai 23 de november sie liber Les Ladins des Dolomites tla senteda de laour dl Intergrup »Minoranzes tradizionales, comunités nazionales y lingac« dl Parlament Europeich a Straßburg. L liber é la pruma descrizion globala di Ladins dles Dolomites per franzous y trata duc i aspec relevanc, da la geografia y la storia dla Ladinia a la formazion y les carateristiches dl lingaz ladin y a la descrizion dla situazion legala, politica y economica di Ladins. Tratant la prejentazion ne à l autour Paul Videsott nia demé rejoné dl liber enstes, ma ence de n valgugn problems, che i Ladins partesc con d’autres mendranzes europeiches: despartizion aministrativa, la mancianza de n lingaz scrit per duta la comunité, i priesc dles ciases y di apartamenc, che la jent dl post ne pò nia plu se permete y che la sforza perchel da s’en jí fora dl raion ladin a abité, y a la fin i evenc internazionai – tl caje di Ladins i juesc olimpics dl 2026 a Cortina – che tegn cont puech y nia di lingac y dles cultures locales y che vegn perchel refodés da la jent dl post. A gauja dla relevanza de chisc ponc, dessi vegnì tratés te sentedes aposta dl Intergrup, à anunzié i doi euro­parlamentars Herbert Dorfmann y Loránt Vince.