La Usc di Ladins

Al é n apuntamënt aspeté dai apascioná de schi, che portará ince tröc atlec internazionai a garejé ti dui slaloms lerc jö por la Gran Risa. L’evënt se desfirará fora por döta la fin dl’edema amez dezëmber, pian ia la sabeda ai 16 de dezëmber cun la festa dla daurida ofiziala tl zënter de La Ila, olache al gnará partí fora les numeres por i altec. Plü tert sará i agonisć dla nazionala taliana a desposiziun por autograms, dan dé le via ala festa tl tendun scialdé a pe dla Gran Risa.
La competiziun agonistica scomenciará spo la domënia di 17 a sonn dla musiga dl DJ Max Ben­zoni, che dará le begnodü ai spetadus man man che les tribünes se implësc. La pröma manche piará ia dales 10:00 y plü tert se depenjará le cil dl’Alta Badia cun i corusc dla bandira taliana tres les »frecce tricolori« dl’Aereonautica Militare Taliana. Inant jarara cun la secunda manche dales 13.30 y premiaziun finala. I medemi orars sará mantignis ince por le secundo de de competiziun, lönesc 18 de dezëmber, che se dauriará cun l’evënt »Sun Risa«, organisé dala Cooperativa Turistica Alta Badia, che ti pormetará a düc i intersciá da jí cun i schi dan le jí sö dl sorëdel y gosté te val’ bela ütia söalalt.

Liede inant tla ediziun nöia de vëndres, 1 dezëmber !