La Usc di Ladins

La sociazion Transdolomites, semper ascorta a la scomenzadives e a la comunicazion che deida a smendrèr la doura di auti privac e a smaorèr l trasport publich, à uzà fora la neves che l servije de mesi publics de la Provinzia de Busan à endrezà per miorèr l coleament anter Busan e Fascia.

Coi 10 de dezember, defat, va en doura l nef orarie che arà regnèda enscin ai 24 de dezember del an che vegn e che porta dant vèlch neva ence per l percors de la Val d’Ega, strategich per arvejinèr semper de più la val ladina con la zità del Sudtirol.

L nef orarie perveit na neva corsa che pea via da Vich per jir jun Busan da doman da les 7.06, e l sperlongiament dal Jouf de Ciareja enfin al paisc de Vich de la ultima doi corses da sera, che les pea via jun Busan respetivamenter da les 20.17 e da les 21.17.

Apede a la segnalazion de chest servije emportant, Transdolomites fèsc a saer che ence i sentadins de Fascia i pel aer derit al Südtirol Pass-AltoAdige Pass, l abonament personal eletronich per l trasport publich tel Sudtirol con n muie de servijes e rebasc.
I oraries de la corses é da poder veder sul sit www.altoadigemobilita.info e sun https://www.suedtirolmobil.info/.../trovat.../altoadige-pass se pel veder ence duta la promozions.

Te chest chèder Transdolomites à ence proponet che per miorèr amò de più la situazion de la viabilità e potenzièr la mobilità publica vegne metù su n desch de lurier che tole ite la Provinzies Autonomes de Busan e de Trent, i Comuns de Neva e Sèn Jan, l’APT de Fascia e l ofize turistich de Neva e i Polins de Fascia e che tole dant la costions de la fermèdes, i oraries, la coinzidenzes e i biliec.

Podede lejer de più su La Usc stampèda de vender al prum de dezember.

 (LG)