La Usc di Ladins

L’Istitut Nazionèl de Statistica ISTAT te la publicazion dai 25 de messèl del 2023 l à metù al luster che l an 2022 l é stat caraterisà da n rescomenz de la mobilità e dachelanvìa ence dai azidenc sun strèda. Del 2022 i é stac 3.159 i morc te azidenc sun strèda te la Tèlia (+9,9% respet al an dant), 223.475 i ferii (+9,2%) e 165.889 i azidenc (+9,2%), numeres maores che del 2021 ma mendres respet al 2019. Ence te la Union europeèna l numer de la vitimes l é smoarà (+3,7% respet al an dant), do che l era jit ju ti doi egn de pandemia (-9,1% respet al 2019). En dut del 2022 la vitimes é states 20.669 contra 19.932 del 2021 e i 22.761 del 2019. Ogne milion de sentadins se conscidra 46 morc per azidenc sun strèda te la Union europeèna e 54 te nosc Paisc, che passa dal 13° al 19° post te la graduatoria europeèna. Anter i comportamenc falé canche se vida al prum post l é la distrazion, no respetèr la prezedenza e la velozità massa auta. La velozità l é l comportament più sanzionà col 38,7% sul total. 

Per sensibilisèr i sentadins sun chel che sozet sun strèda en mèrtesc ai 14 de mé da mesa les nef da sera te biblioteca de Ciavaleis la sociazion Transdolomites endreza na scontrèda publica dal titol »Teritorie, segureza, mobilità e cosć sozièi«. Tol pèrt l Comandant di Carabinieres de Ciavaleis Daniele di Vincenzo, l Comandant di Polins de Fascia Gianluca Ruggiero, Giordano Terracina di Polins de Fiem, l diretor de Automobile Club Trent Leopoldo Zuanelli Brambilla, l president de la sociazion Vivinstrada Alfredo Giordani e Gioia Bucarelli che à rencurà l liber »La strada e la vita. In ricordo di Huub Pistoor e di tutte le vittime della violenza stradale«.

De più su La Usc stampèda de en vender ai 10 de mé.



 (Monica Cigolla)