La Usc di Ladins

El comando noo inze el touladel desote de ra Ciaśa de Comun; ra moto noes da se moe pi svelte; un bando da tuoi su outre poliziote; laore par tegnì fora ra machines da ra piaza; grade pi oute par ra parsones che ‘s é drio a lourà ades. El Comun de Anpezo ‘l é drio a fei duto chel che el pó, par aé un comando de ra polizia de comun pi gran, che el pode lourà depì e meo.
El loudaduó Stefano Ghezze Ghezo ‘l à acaro par chel che ‘l é suzedù a Luis Caranfa, che ‘l é deentà comisario, da vize comisario che ‘l ea ignante. Giovanni Del Longo ignante ‘l ea asistente, ades ‘l é ispetor: «Chesto vó dì che i nostre poliziote i é drio a lourà polito – el disc Stefano Ghezo – e i é stade varentes chera setemanes, chi mesc de gran reśiro parel paes, ‘l inverno pasà, par i Śoghe olimpiche e paralimpiche. Luis Caranfa ‘l é ruà in Anpezo da Treviso alolo ignante e ‘l à sapù lourà polito, sote i oce de duto el mondo, e se fei benvoré da ra śente del paes. Giovanni Del Longo el laora in Anpezo dal 2008, ‘l é ra memoria storica del comando, dute i và da el se ’l é biśoin de saé algo, chi outre che laora con el, i aministratore e i zitadis. Darśonśe chiste grade pi oute ‘l é bel par lore, ma ‘l é bon par duta ra scuadra, che r’à fato duto chel laoro, canche ‘l é stà biśoin. El comandante Caranfa, dià da dute chi outre poliziote, ‘l à fato vede cemodo che se pó fei polito sto laoro, canche dute i varda chel che te fesc».

De plu tla edizion stampeda de La Usc di Ladins o sun l e-paper a paiament www.lausc.it/e-paper