La Usc di Ladins

Chest’aisciuda passèda l MUSE de Trent à metù a jir la scomenzadiva »Zircol de la scienza«, con na lingia de scontrèdes culturèles dedichèdes a la persones con più che 60 egn. Chest event à abù n gran suzes, con duc i posć ocupé e na fila de jent prenotèda. A confermèr la valuta de chesta sort de scomenzadives, apede al bon ejit abù, l é ence i dac scientifics che vegn fora dal report su cultura e sanità del 2019 de l’Organisazion Mondièla de la Sanità e da CultureForHealth del 2022 che disc che jir ti musees fèsc ben a la sanità. Aldò de chest l Muse à dezidù de jir inant con n’autra lingia de 5 scontrèdes che pea via ai 13 de otober e les jirà inant enscin ai 10 de november, semper de lunesc da les 3 fin les 5 domesdì. Per aer maor informazions sul cost e la prenotazions se pel chiamèr l numer 0461 270391 o jir sul sit internet www.muse.it.
L obietif l é soscedèr la curiosità e endrezèr ocajions de sozialisazion per la persones de età, elemenc de gran emportanza per schivèr l isolament e l smendrament de la funzions cognitives.
I temes cernui per chesta seconda edizion del »Zircol de la Scienza« l é chi de l’inteligenza artifizièla, la gran besties magnacèrn, l benstèr psicofisich, la alimentazion sèna e la biodesvalivanza tropicala.

Se pel lejer dut su La Usc nr 39 dai 10 de otober, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.



 (LG)