La Usc di Ladins

»Virgilio Soraperra de la Zoch. L’èrt e l leam con sia tera« l é l titol de la mostra de operes del artist da Gries, a 10 egn da la mort, inaugurèda anché jebia ai 16 de otober da les 11:30 te la sala de raprejentanza del Palaz de la Region de Trent. Na mostra endrezèda da la Region Trentin Sudtirol con l assessor a la mendranzes linguistiches Luca Guglielmi che à tout su con gust la desponiblità di fies de Virgilio, Claus e Anna Rosa, per endrezèr na esposizion de sia operes e fèr cognoscer coscita n artist che »te noscia Region no l é fosc cognosciù da duc, ma che l é amò sot i eies de duc, defat i é cent e cent i depenc a fresch su la cèses de ogne valèda che i porta l segn carateristich de sia man« scrif Guglielmi te la prejentazion del catalogh de la mostra. L’esposizion, che à binà a una vèlch opera più carateristica del artist Soraperra, é stata rencurèda da Giuseppe Tasin, curador di bens artistics de la Region Trentin Sudtirol e la é da poder veder tel Palaz de la Region a Trent enscin ai 23 de otober.



 (Monica Cigolla)