La Usc di Ladins

Pra la senteda generela anuela dla Majon prufesciunela di mëinacrëp de Südtirol ne n'à Zelger nia mé pudù saludé l patron de cësa Heiner Ober­rauch tla sënta Salewa, sënta dl partner di mëinacrëp, ma nce Luis Walcher, assessëur provinziel per l turism. Ël à sotrissà la mpurtanza di mëinacrëp per Südtirol y la mpur­tanza de na bona furmazion coche chëla di mëinacrëp, che vën sustenida dala Provinzia. Thomas Zelger à fat n rendicont scialdi positif che vën sambën nce partì dai mëinacrëp. Nia mé la maiuranza dl cunsëi ese­cutif ie unida liteda da nuef, ma Zel­ger ie nce unì cunfermà te si ncëira da presidënt. Nce Bernhard Mock resta inant te si ncëria da vize presidënt.

»La vela de crëta da pert de nosc cumëmbri nes dà l mesun de jì inant cun nosc lëur«, à dit l pre­­sidënt Zelger. »Nce sce l ie ndes­fides nueves, iel mo nteres per l me­stier, coche desmostra nce i di­ploms che l assessëur provinziel Walcher ti à prejentà n sada a diesc mëinacrëp nueves, sies candidac y una na candidata. L se trata de zifres che fej mprescion y l nes fej plajëi che l sibe mo jëuni che pudon ispiré a fé nosc mestier. Purempò vëniel cialà de purté inant l mestier da mëinacrëp, dantaldut tl vest dl luech, per ejëmpl tla val de Vinschgau, ulache l mancia talënc jëuni«.

L articul tla edizion atuela de La Usc di Ladins.