Dai 4 ai 7 de jügn ospitëia Al Plan de Mareo i campionac dl monn y i campionac nazionai dl’Austria söi orghi da man. Al é le secundo iade che chisc campionac röia te Südtirol y le pröm iade che ai röia sön terac ladin – y chësc cun na partezipaziun demorvëia de incër 270 sonadus y sonadësses. La jöbia sëra él sté sön paiun d’Al Plan la daurida ofiziala cun na serada dedicada ala tradiziun, ala ligrëza y sambëgn ala musiga. Le bun sonn di orghi da man án aldí dala Orchestra di orghi "Dolomites" cun sonadus da chiló sot la direziun de Eduard Huber da Peraforada, sciöche ince dal solist de gran talent Pire Ellecosta da La Pli – che tol instës pert ai campionac. Le Cor moscedé "Decá y Delá" á dé na cercia dl
bel cianté ladin intonan l’Inn Ladin, i Platleri Salvans á mostré so förtl te sü bai tradizionai y ince le grup "KlangAlm" álascé aldí ci bun sonn che al gareta danter clarinëc y orghi. I salüc ofiziai é gnüs dal vizeombolt de Mareo Paul Pisching y dal diretur dl Departimënt Scora y Cultura Ladina André Comploi. Y sambëgn ince da Werner Weibert, le presidënt dl Harmonika-Verband Österreich, che organisëia i campionac. Sce l’evënt é rové te Mareo, él por interessamënt dl maester Eduard Huber, che é rapresentant de Südtirol y bele da agn ince tla juria di campionac. Y spo sambëgn dla Cooperativa Turistica Al Plan/San Martin, che á surantut la pert logistica dl’organisaziun y á bele la pröma sëra metü a saul n gröm de lalc. La HVÖ á ince tut chësc pröm apuntamënt por i surandé a Eduard Huber y al diretur dla CT Carlo Runggaldier na onoranza y reconescënza.
Chësc vëndres y en doman sabeda él spo döt le de i campionac, te salf dles manifestaziuns y te scora mesana, olache la jënt á la poscibilité da jí a d’ascuté sö. Les informaziuns plü menüdes ciafon sön
https://harmonikaverband.at/event/harmonika-weltmeisterschaft-und-staatsmeisterschaften-2026/Düc é sambëgn ince bel inviá al program de cornisc, che vá inant chësc vëndres dales 20:00 pro paiun, cun na serada olache al é da aldí le Klemen Roser Trio dala Slovenia y la Musiga "Catarina Lanz" d’Al Plan. En sabeda dales 14:00 inant vëgnel pité pro paiun na cercia de produc da chiló y dales 19:00 él spo la premiaziun di campionac cun conzert di davagnadus.
(pablo)
