La Usc di Ladins

La Crousc Checena à set prinzipies fondamentai, che la spartesc con la Mesa Luna Checena e che te chest temp de veres tel mond i doventa amò più emportanc; i rejona del besegn de umanità, de se dèr ju per didèr conscidran ogne persona a la medema maniera, a na vida neutrala e indipendenta che va sorafora la pèrts en conflit, e de valores desche l volontariat, la unità e la universalità, che no pel conscidrèr la veres desche vèlch che amò anchecondì fèsc naturalmenter pèrt de la vita de la persones. Chisc prinzipies é stac recordé e sotrissé en vender ai 8 de mé, te la Giornèda mondièla de la Crousc Checena. 
Te chest dì, l'emportanza de la CRI a livel mondièl e sia gran atività ence a livel local é states portèdes dant te na scontrèda endrezèda te La Gran Ciasa a Soraga dal Comitat de Fascia e Fiem de la Crousc Checena con l president Francesco Sommavilla, che ensema con l president del Comitat provinzièl trentin Sergio Bonadio i à metù l azent sul Derit internazionèl umanitarie e l besegn, te chisc tempes de conflic, de tegnir auta l'atenzion acioche amancol vegne respetà la regoles che perveit che ence en temp de vera vegne smendrà più che l é meso i padimenc de la persones e stravardà la popolazion zivila che no combat.

Podede lejer dut su La Usc dai 15 de mé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (Lucia Gross)