La Usc di Ladins

Le festival dles scoltöres tla nëi danter Al Plan y Sanciana, organisé dal’Assoziaziun Turistica Al Plan/San Martin y sü colegs de Puster, é rové a süa 29ejima ediziun. Scuadres da plü perts dl monn - ince de Südtirol - á dai 9 ai 11 de jená ziplé fora de n gran cadrel de nëi sües scoltöres, che abelësc sëgn la strada prinzipala d’Al Plan. Dai 14 ai 16 de jená se spostará les scuadres a Sanciana, por realisé ince iló sües operes d’ert. Impormó dedô gnarál tigní te Puster la premiaziun por intrami i paisc.
Les scoltöres d’Al Plan é garatades avisa adaldërt ince por la gara de copa dl monn dles ëres, che sará en mertesc sön la pista ”Ërta”. Bele chësta domënia sëra sarál da aldí tl zënter n conzert impröma cun le campiun di orghi badiot Ermes Costa y spo cun Herbert Pixner y süa Italo-Connection. Le conzert vëgn tigní te Pincia dal Cone, olache an podará spo ince odëi davijin les scoltöres de nëi, iluminades sot na löm particolara.  (pablo)