La politica dl döt y dl nia

Data

02 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Do plü de 20 agn de politica dl döt y dl nia tambëgn a livel nazional che ince local, nes á le coronavirus fat capí che insciö ne podunse nia plü jí inant.
Che tla politica ne fejon mai düc contënc é da capí, mo canche les dezijiuns é mosorades y nia früt de interesc de val' grup de podëi, canche ares vá da n schem razional y trasparënt, podaráres tert o adora gní capides da düc.
Tosc él lítes comunales, do mia minunga bindebó importantes sce an ó mudé, sce an ó jí de n vers nü! Vers nü che é la sora soluziun. Mo ci ó pa dí nü? Nü ó dí n modo nü de fá politica, n modo tler y trasparënt. La jënt é stüfa dla politica che moscëda tres sö la medema jopa cun protlamaziuns generiches che ne dij nia. Al vá debojëgn de propostes concretes y de mostré sö co che an ó les realisé; chiló vál sambëgn debojëgn ince dla competënza di aministradus. Te chisc agn él jü tla politica tröc che ne sá gnanca olá s'oje canche ara vëgn da tó dezijiuns, che ti salta do a vigni like. Jënt plü cruziada da fá marketing dla porsona che da lauré fora propostes y studié co les realisé.
Por jí ite tl plü concret te nüsc comuns, ó la jënt respostes concretes a plü tematiches.

Ma val' ejëmpl chiló:
- Cutes: co ó pa i comuns ti gní adincuntra a nosta jënt? Arbas­sunse l'Imi o no? Arbassunse la cuta de sojornanza sce o no? Tolunse jö l'Ica, la scudiunse »inhouse« o la fajunse scudí da na impreja da defora che se tëgn feter döt, por fá valgügn ejëmpli.
- Urbanistica: slariunse fora y lasciun frabiché la jënt sön so terac ince fora dl zënter o impi­funse sö danü döt? Ti lasciunse afité ia ai pici privac n apartamënt o l'ater o ti menunse vigni secundo de controi? Junse inant cun le fá marciapísc tl zënter o lasciunse laurs mec fac? Fajunse le tru dles rodes, sce o no y co?
- Scora: ci fajunse pa cun les stro­töres vedles, sciöche por ejëmpl la scora elementara da La Ila? La fajunse sö danü, tl medemo post, plü grana cun palestra y refeziun, sce o no?
- Segurëza dla jënt: ti dunse prezedënza al'economia, ince cun proiec de prigo, o ti dunse plü importanza ala segurëza dla jënt, sce o no? Ci intervënc de proteziun zivila gnarál pa fat?
- Sozial: tan sostignunse pa nostes uniuns y aladó de ci criters vëgn pa dá fora i contribuc; al ó ester regoles avisa a na moda che les assoziaziuns pois programé. Ci sostëgn ales families en dificolté orunse pa dé?
- Viabilité: co orunse pa smendrí le trafich y realisé na mobilité sostenibla y efiziënta? Chiló vál debojëgn de propostes tleres y nia frases de zircostanza.

Chisc é ma val' ejëmpli!
I me augüri che por mi comun, chël de Badia, ciafunse chëstes respostes da Christian Pedevilla, Iaco Frenademetz y Manfred Canins, candidac da ombolt.  (Albert Pizzinini, La Ila)

Galaria retrac