Bon di Georg, te respuende inò a ti lëtra tla Usc di 13 de fauré.
La Cësa di Ladins ie aldò dl Plan urbanistich te n raion per strutures publiches y te chësc raion iel udù dant che n muessa nce fé n Plan de atuazion. Chësc PdA unirà fat deberieda cun l pruiet y tl PdA nstës pòssen udëi dant tan de plazes dai auti che ie debujën per chësc raion.
Tl Plan urbanistich de Urtijëi iel udù dant regules desfrëntes per la plazes dai auti, aldò dla destinazion spezifica de uni grunt. Na plaza dai auti uni 200 m² vel per cubatura da sté, ma nia per d’autra destinazions.
N generel iel da dì che la CdL ie saurì da arjonjer cun i mesuns publics o nce a pe y cun la roda. Truepa ziteies y truep luesc tl’Europa cëla de se svilupé inant, jan inò demez dal auto, crian na lerch publica zënza auti. A Urtijëi uelen ënghe tò demez i auti da Plaza S. Antone y nvië nscila la jënt a jì de plu cun la rë de mesuns publics che vën miureda for plu y plu.
Da dì iel che aldò dl plan di architec che à venciù l pruiet pudëssen pensé de fé n valguna lueges dai auti da na pert su, ulache l ie śën la streda. Nia ne stluj ora che n feje nce lueges per i auti dan Cësa – n pue‘ coche l ie śën, ma chël ulessans bën cialé de schivé pra l frabicat nuef, ajache n jissa a se reviné la bela lerch che ie ududa dant dan cësa. N linia de mascima pudons dì che la cuestion dla lerches da lascé i auti ie mo davierta y deberieda cun la grupa de lëur per la Cësa di Ladins, che unirà śën tosc metuda su, cialeran zënzauter de unì a una. Coche for unirà uni dezijion mpurtanta cunedida te cunsëi y tl’assembleies genereles dla ULG cun i cumëmbri prejënc. Tan de jënt che vën pra la reunions genereles ne pudons nëus nia nfluenzé plu de ntant.
N cont dla cuestions plu tecniches n cont di grunc y dla cunzescion da frabiché iel dessegur mo da se la studië scialdi bën deberieda cun n notar y cun n cumerzialist per capì tl detail coche l cunvën a fé, davia che l aspet dla chëutes ne ie nia da sotvaluté. Tla cunvenzion iel a uni maniera assegurà che la ULG ruva pra si tòch aldò dla documentazion njunteda ala cunvenzion nstëssa.
Cun de biei saluc te saluda,
a inuem dl cunsëi dla ULG,
Sofia Stuflesser
