La Usc di Ladins

Marcià di libri adurvei de Segra Sacun
Coche l ie bele tradizion meterà la trëi biblioteches publiches dla valeda – San Durich, Tresl Gruber y O. v. Wolkenstein – nce chëst ann a jì l marcià di libri adurvei de Segra Sacun
I libri tëuc ora dala biblioteches – ajache danejei o nia plu atuei – y chëi dunei dai privac unirà vëndui a 1 € per liber. I scioldi che vën trac ite unirà pona inò dac ora per l bën dla trëi biblioteches.
L marcià di libri sarà a Urtijëi tla Cësa di Cungresc Luis Trenker dan l ufize dla Lia dl Turism y l scumencerà n lunesc ai 10 de utober dala 08:00 nchin la 18:00. N merdi ai 11 de utober saràl daviert dala 08:00 nchin la 12:00 y dala 14:00 nchin la 18:00, n mierculdi ai 12 de utober dala 08:00 nchin la 12:00.
La trëi biblioteches se ncunforta sun vosc unì!

Jita culturela a Belun
L Museum Gherdëina nvieia a na jita culturela a Belun, n sada, ai 15.10.
N jirà a ti cialé al Museum Zivich, al Seminar Gregorian y al zënter dla zità.
N pierà via dala 07:00 da Plaza de Sant Antone cun la curiera, per furné nchin a Belun. Ilò saràl na vijita meneda tl zënter dla zità. Da dedò jiran a ti cialé al Seminar Gregorian, che ie unì restaurà dan da puech. Da marënda maieràn tl restaurant La Taverna.
Domesdì saràl pona na vijita al Museum Zivich. Dala 16:30 uniràl inò muet de viers de cësa, ulache n ruverà ntëur la 19:30.
L priesc dla jita ie de 65€ per cumëmbri:es y de 70€ per nia cumëmbri:es – laite iel l viac cun la curiera, la marënda y la ntredes cun vijita meneda.
Iscrizions: nchin n merdi ai 11 de utober dala 18.00 tl Museum o cher­dan su l numer de telefonn 0471 797554, email a: info@museumgherdeina.it. Per d’autra nfurmazions: 339 7069012.
Paië ite possen diretamënter tl Museum, dala 09-12, 14-18 o tres banca: Cassa dl Sparani, IBAN : IT 51 F 06045 58680 00000011 9900
Raiffeisen Gherdëina, IBAN: IT 98 M 08238 58680 0003020 27585
L Museum Gherdëina se ncun­forta sun Vosc unì.

Teater a Santa Cristina
La Lia dal Teater de Santa Cristina festejea chëst ann si 40 ani. Per chësta ucajion vëniel purtà dant n pez de teater da rì per gherdëina
Chalet Autonn (»Dreistes Stück im Greisen­glück bzw. Turbulenz in der Seniorenresidenz« de Bernd Gombold), ie l titul dl pez purtà dant. Traduzion tl gherdëina de Bruno Senoner, regia de Isolde Senoner.
Tla cësa dla jënt de tëmp »Chalet Autonn« vàla suvënz mpue sotsëura. Nia a duc ti scùsel coche la diretëura dla cësa mëina la strutura te na maniera scialdi autoritera y cun truepa straufonghes. Chi che s’la paia ie dantaldut Nene Nando. Per fertuna ti juda si cumpani Paul y la nepota Kathrin. Nia ti judé ne ti juda si parënc, che ne vëija nia l’ëura de pudëi arpé dut chël che va… Ma Nando y si cumpani Paul ne la dà pa nia su tan prësc y se lascia tumé ite for inò zeche de nuef…
L pez ie da udei, for te sala de Chemun de Santa Cristina:

• Juebia,
  • 
  •  

  View the embedded image gallery online at:
  https://www.lausc.it/manifestazions-y-evenc/21118-manifestazions-atuales-speziales#sigProId0060079055
  06.10.2022 dala 20:30 (premiere)
• Dumënia, 09.10.2022 dala 17:00
• Merdi, 11.10.2022 dala 20:30
• Juebia, 13.10.2022 dala 20:30
• Sada, 15.10.2022 dala 20:30
• Dumënia, 16.10.2022 dala 17:00

Atëures: Nene Nando: Hans Peter Runggaldier; Paul (si cumpani): Willy Runggaldier; Fatima: Marina Insam; Sieglinde (la badëssa): Annemarie Schenk; Robert (mut de Nando): Samuel Perathoner; Lidia (fëna de Robert): Mary Kerschbamer; Kathrin (muta de Robert y Lidia): Cornelia Demetz; Nick (nevic de Kathrin): Kevin Schieder; Anda Babi: Agnes Runggaldier; Richard (2. mut de Nando): Matthias Runggaldier.
Che dij ite: Silvia Senoner
La chertes danora pòssen apusté tla butëiga »Antik y Rariteies« dala 10:00 nchin la 12:00 o cherdan su Paola Stuffer al 339 3399266
Sun Vosc unì se ncunforta duta la grupa de teater!

Retrac de Bruno d’Amicis
Le Fotoclub Val Badia invëia ala proieziun de retrac de Bruno d’Amicis en jöbia, ai 06.10.22, dales 20.30, tl Istitut Ladin Micurá de Rü a San Martin de Tor
Le Fotoclub Val Badia á le plajëi da invié en jöbia, ai 06.10.22, dales 20.30, tl Istitut Ladin »Micurá de Rü« a San Martin de Tor, a na proieziun de fotografies dal titul »Do vigni fotografia él na storia de n fotograf«.
I apascioná dla fotografia dla natöra dla Val Badia á la poscibilité da odëi i laurs dl fotograf conesciü dla Talia Bruno d’Amicis. Sües publicaziuns é da ciafé ti foliec National Geographic y GEO y al á ince davagné pesć pro i concurs dl World Press Photo y Wildlife Photographer of the Year.
Le fotograf profescionist nes mo­strará fotografies de livel alt söi tiers y paesaji dla natöra.


»Green Event«: ci é pa chël? Co l’organisëion pa?
A chëstes domandes respogn te n referat online Elisa Poznanski, funzionara dla Provinzia de Balsan dl Ofize por la gestiun dl refodam y la reduziun dla spaterlada dl mangé
I »Green Events« é manifesta­ziuns organisades aladô de criters de sostenibilité: al vëgn adoré produc ecologics, ciaran da valorisé i produc locai, al vëgn ciaré da consumé pücia energia, da prodüje manco refo­dam ch’ara vá y da le despartí, da se tó sö la respon­sabilité ti con­frunc dla sozieté. Les ma­nife­staziuns che tëgn ite chisc criters pó ciafé na zertificaziun de »Green Event«. Aldedaincö él ince tres deplü organisaziuns y uniuns che proa da mëte a jí sües ativités sciöche »Green Event«. Deplü informaziuns sön l’argomënt ciafarán ai 6 d’otober dales 17:00 pro chësc referat online. Dötes les uniuns y organisaziuns, mo ince les dites y aziëndes locales é dër bel inviades da tó pert! Vigni pice vare devers de na majera sostenibilité é n bun vare! Le link por tó pert é https://us06 web.zoom.us/j/82253080616
Organisaziun: Consëi de For­ma­ziun de Badia.


Roba da fé damat a fin de bën
La grupa Gherdëina per l Perù mët inò a jì n stont pra l marcià dl VKE a S. Cristina n sada ai 08.10. y pra l marcià de Segra Sacun ai 10.10., ulache l unirà vendù roba da fé damat (juesc, libri, lego, tieres de stof…) de segonda man
Ëis’a roba da fé damat (juesc, libri, lego, tieres de stof…) che ne ulëis nia tré demez?
Pona sons cuntënc sce ulëis i dé ju nchin ai 08.10. pra:

• Lucy y Stefan Perathoner, Streda Roma 32b
• Helma y Andreas Walpoth, Streda Purger 61
• Valentine y Egon Stuflesser, Streda Digon 18.

Cun la cosses che unirà vendudes pra l marcià, puderàn ti judé ai mutons y ala mutans tl Perù. De gra de cuer!
Info: Andreas Walpoth 3474057104, Sofia Stuflesser 3314158478 y Lucy Perathoner 3319396137.

Cor di Jëuni Gherdëina: mëssa a ot ujes
N sada ai 01.10. dala 20:00 tla dlieja de Santa Cristina y n dumënia ai 09.10. dala 09:30 tla dlieja te Sëlva
Do l proiet de eagost n ucajion dla Bienela Gherdëina, uniràl de utober ciantà doi mësses, ulache l cor arà l plajëi de fé la prima perfor­mance dla »Missa a ot ujes« de Claudio Kerschbaumer.
Kerschbaumer ie nasciù tl 1962 y à studià tlavier a Trënt. Deberieda cun Gebhard Piccolruaz àl tl 1996 metù su l Ensemble Gherdëina, de chël che l ie ncuei mo un di dirighënc. Ani alalongia iel stat dirighënt dl Cor de Dlieja de S. Cristina y ncuei iel dirighënt dl Cor de Laion y dl cor di ëi Raetia de Urtijëi. Ti ani danter l 2018 y l 2021 àl scrit na mëssa a ot ujes cun cater pec, che ël à dedicà al Cor di Jëuni Gherdëina: l Kyrie, Gloria, Sanctus y l Agnus Dei.
L Cor di Jëuni Gherdëina y si dirighënt Samuel Runggaldier prejenterà chisc pec per l prim iede ntan doi mësses, che sarà n sada ai 01.10. dala 20:00 tla dlieja de S. Cristina y n dumënia au 09.10. dala 09:30 tla dlieja de Sëlva. Ntan la mësses saràl nce da audì l Ave Maria de Claudio Kerschbaumer y l Ubi Caritas de Maurice Duruflé, n pez che à plu o manco l medemo stil di autri.
I ciantarins y la ciantarines dl Cor di Jëuni Gherdëina se ncunforta a pudëi saludé duc i apasciunei y la apasciunedes de mujiga.