La Usc di Ladins

Conzert d’altonn dla Müjiga da La Ila
Do dui agn de palsa se lascia odëi y aldí la Müjiga da La Ila ai 22 d’otober dales 20:00 tla Ciasa dla Cultura da La Ila cun n dirighënt nü: Konrad Tavella
Al gnará porté dant toc fora de n repertore dër rich che vá dala musiga moderna a toc plü classics, che condüjará le publich tres n iade musical fora por le monn. Le conzert gnará daurí da »Captain America March«, toch de Alan Silvestri aranjé da Michael Brown y jará inant cun »Pacific Dreams« de Jacob de Haan, »Oblivion« cun solo de clarinet, scrit da Astor Piazzolla y aranjé da B. Moren y Hotline de Lex Abel. Inant podaran aldí »Ponte Vecchio« de Satoshi Yagisawa cun solo de trombëta, »Let me entertain you« de Robbie Williams aranjé da David Campbell y »Concerto d’amore« de Jacob de Haan. Por stlü jö gnaral soné »Marche Du Luxenbourg« de Robert Allmend. Düc é dër bel inviá a gní a d’ascuté sö. Por le sostëgn finanziar vëgnel rengrazié la Cassa Raiffeisen Val Badia y le Consëi Cultural.

Jüc por döta la familia
En jöbia ai 13 d’otober röiel a La Ila le »Spielemobil« cun jüc por döta la familia, che an pó ince s’impresté fora
Le bus dai jüc dl »Spieleverein dinx« s’archita indô a La Ila, te biblioteca, en jöbia ai 13 d’otober dales 15:30 ales 17:30. Pici y gragn pó passé n domisdé d’aurela cörta cun na gran cerna de jüc da mësa.
N espert dará consëis y spligará les regoles di jüc, che an podará ince s’impresté fora.

La Bira Te Fascia
L Festival de la Bira artejanèla da Mont a Poza dai 14 ai 16 de otober
Ruà a la 8^ edizion, l aprijià festival dedicà a la bira artejanèla da mont muda sajon e location.
L event vegn metù a jir tel temp del uton, sajon dai colores magics che recorda la beanda endorèda, te tendon de la manifestazions de Poza, te Piaz dal Malghèr.
Dai 14 ai 16 de otober i produtores podarà ge proponer a la jent del post e ai ghesć na esperienza fora de anter, lean bires de calità, bon magnèr e prodoc de ezelenza de Fascia, musega dal vif e saeres del teritorie.
Tel weekend se podarà tor pèrt a masterclass, momenc outdoor de degustazion-spetacol te la bela Val de Sèn Nicolò e n Bike&Taste tour per descorir i lesc de produzion de bira e formaes te Fascia.
En vender e en sabeda ai 14 e 15 de otober l tendon sarà avert da les 4 domesdì fin mesanot e en domenia ai 16 da les 10 da doman fin les 8 da sera.
Canche aur l Festival l é pervedù ence na pèrt dedichèda al b2b, per meter en relazion operatores del setor e produtores e creèr na ocajion de cultura su la bira artejanèla da mont.
L 8° Festival La Bira Te Fascia é endrezà da la Sociazion Comunicarea en colaborazion con l’APT de Fascia, la Strada dei Formaggi, l Comun de Sèn Jan e col patrozinie de Unionbirrai.
Per maor informazions: www.labiratefascia.com – labiratefascia@gmail.com – 329 9159877.

20 ani marcià bio
L cunsëi dla Lia per Natura y Usanzes ve nvieia de cuer a unì a festejé deberieda i 20 ani de marcià bio
L marcià, ulache de plu paures bio dl Südtirol venderà si prudoc, unirà a s’l dé n sada ai 8 de utober sun Pitla Plaza de Sant Antone a Urtijëi, dala 09:00 inant.
Nce la Lia per Natura y Usanzes piterà velch de bon pra si stonc: tëurtes y strudli fac nstësc, pans d’uni sort, sambën dut fat cun prudoc biologics. Nce la castanies pratedes ne mancerà nia y l stont dal craut sarà ënghe inò sun plaza. Chi che ulëssa se mplenì si barijel possa se lascé fé ju l craut da esperc – per gaujes de urganisazion vëniel tlo prià bel de se nuté su da Manuela al 320 6057980. Sëuraprò saràl nce inò n valgun jëuni che torna sun plaza. Unide a fé na viva!

Wilhelm Senoner – atelier y galaria davierc
N

• 
•  

View the embedded image gallery online at:
https://www.lausc.it/manifestazions-y-evenc/21187-manifestazions-atuales-speziales#sigProIdcf3b60fa77

ucajion dl »Di dl cun­tem­purann« uniràl giaurì al publich sibe la galaria che nce l atelier
Nce chëst ann fej l artist pea pra la 18ejima edizion dl »Di dl cuntempurann«, na manife­stazion metuda a jì da AMACI, n’assoziazion no profit che lieia bën 24 museums de ert cuntempurana dla Talia.
Te chësta ucajion uniràl giaurì al publich sibe la galaria che nce l atelier, tla streda Arnaria 9/1, n sada ai 8 de utober dala 10:00 inant nchin la 17:00 (orar continuatif).
L unirà danter l auter nce prejentà i doi libri monografics de Wilhelm, un curà da Philippe Daverio y l auter da Leo Andergassen, curadëur dla mostra davierta atualmënter tl Museum provinziel de Ciastel Tirol – davierta nchin ai 20 de nuvëmber.
Sun vosta vijita se ncunforta Wilhelm y Claudia.

Après Ski – mostra de Felix Malnig, Haldis Scheicher y Roland Ferrigato
La giaurida ie duman sada ai 08.10. dala 18:00 te Tublà da Nives te Sëlva. La mostra jirà inant nchin ai 30.10, uni di dala 16:00 nchin la 19:00. De lunesc iel stlut
L Tublà da Nives nvieia ala mostra dal titul »Après Ski«, ulache l sarà da udëi depënc de Felix Malnig, ubiec y belijies de Haldis Scheicher y fotografies de Roland Ferrigato.
Uniun per si cont ti ie i trëi artisć jic permez te manieres desferëntes al argumënt dl sport da d’inviern. Ntan che Haldis Scheicher se dà ju cun materiai y cosses dl sport dai schi de segonda man y adurvei su – i trasfurman te d’uni sort de ubiec y belijies –, mostra i chedri de Felix Malnig coche l turism à mudà la cuntreda. Roland Ferrigato, che vën dal Südtirol, à cunlaurà cun Haldis Scheicher y porta si criazions y opres d’ert a n livel nuef tres si nterpretazions. Paroles danora de Brigitte Matthias.

La degustazion de vins più auta del mond
Al Refuge Maria sunsom l Sas Pordoi ai 14 e 15 de otober Masterclass e Simposio Top Wine
Masterclass ai 14 de otober da les 14:00 a les 16:30
N domesdì dedicà a n viac enologich e culturèl per descorir la Piana Rotaliana e la storia del Teroldego, con elemenc de storia e curiositèdes sul teritorie e sia ua autoctona. Da la cordanza anter Ais Trentin e Teroldego Evolution se podarà cercèr 9 vins raprejentatives inter­preté da joegn produtores, per la pruma outa sun Sas Pordoi na esperienza da no desmentièr.
Simposio Top Wine ai 15 de otober da les 10:00 alle 17:00
L é la più auta degustazion de vins al mond, n event unich pissà da Armin Detone e Giuliano Cadrobbi, te n lech da merevea: l Refuge Maria sunsom l Sas Pordoi, a 2950 metres tel cher de la Dolomites. Ruà a la 22^ edizion, chest event l é n simposie che ne permet de descorir i gregn vins del Trentin e chest an ence del Piemont. No menciarà la bona magnadiva col piat Top Wine e finger food, n moment de auta calità arsegurà da colaborazion preziouses.
La teraza de la Dolomites
L Refuge Maria l é n lech olache la maestosità e l’èrt de la natura lascia zenza paroles, fac ite tel spetacol de la Dolomites. Ge vel demò 4 menuc a ruèr su la teraza de la Dolomites co la forenadoa dal Pas Pordoi. Chest impiant, volù da la Mère del Pordoi, Maria Piaz, e da sie fi Francesco, l à tacà a jir del 1963. La forenadoa de Sas Pordoi resta averta fin al prum de november da les 9:00 e les 16:30.
Magnadiva de auta calità
Piat Top Wine: spaghet cadrat Felicetti reidratà, smauz enfumià, trota bio e polver de finferles, pissà e enjignà da la Sociazion Cheghes de Fascia.
Finger food: enjignà e servì dai studenc del Zenter de Formazion Profescionala ENAIP de Tieser, en colaborazion coi chef de la Sociazion Cheghes de Fascia.
N event endrezà da la Sozietà Increment Turistich Cianacei, con calità arsegurèda da 20 cèvenes de aut livel per la pèrt enologica e da la colaborazion con Pastificio Felicetti, Cedea Mineral Water, Thrill, Sommelier de Fascia e Fiem, Sociazion Cheghes de Fascia, Zenter de Formazion Profescionala ENAIP de Tieser, N’Outa.
Info event: www.valdifassalift.it

Curs da fá ciandëres
Curs cun Pia Pedevilla, ai 19 y 20 d’otober a La Ila
Le Consëi de Formaziun de Badia mët a jí n curs de döes sëres, da fá ciandëres por Gnissant y Nadé, cun la designer Pia Pedevilla. Al gnará adoré tecniches nöies, sciöche ince p. ej. scritöres. Al vëgn metü a desposiziun le material y les plates cun les istruziuns, le cost vëgn paié al momënt. Le curs vëgn tigní ai 19 y 20 d’otober dales 19:30, te scora mesana da La Ila. Iscriziuns anter i 12 d’otober pro Margit, al 340 3438709.

Dolomites – la belëza de n paesaje
Sepp Hackhofer mostra sü retrac en jöbia ai 13.10. dales 20:30, tl salf dl Istitut Ladin a San Martin
Le Fotoclub Val Badia á le plajëi da invié en jöbia ai 13 d’otober dales 20:30 tl salf dl Istitut Ladin »Micurá de Rü« a San Martin de Tor. Al sará na proieziun de fotografies dal titul »Dolomites – la belëza de n paesaje«.
Sepp Hackhofer é un di foto­grafs conesciüs a livel de Südtirol y é ince sté presidënt di fotografs dla natöra »Strix«. Süa tematica é les Dolomites; fora por les cater sajuns nes mostrel la belëza dla contrada de nostes munts. Tles fotografies de Hackhofer pón odëi la morvëia di corusc che la natöra nes mostra chiló da nos.

Amisc dles erbes s’incunta
La sëra de informaziun cun l’esperta de erbes y ciüfs Helga Alton vëgn organisada en jöbia ai 13 d’otober tla biblioteca da Pedraces
Erbes y plantes ciafon tla natöra de vigni sort y an pó les adoré por prevegní y ince por curé mai y maraties. Mo al é dër important da les conësce indortöra denanco les cöie.
En jöbia ai 13 d’otober dales 20:00 se incunta i amisc dles erbes tla biblioteca da Pedraces. Cun l’esperta de ciüfs y erbes Helga Alton podaran imparé da conësce n valgönes erbes che crësc tla natöra y savëi sciöche an pó les adoré.

Presentaziun dl liber »Case«
Indoman, sabeda ai 8 d’otober presentëia Helena Molinari so liber nü tla biblioteca da Pedraces. Le liber é en pert ambienté a Badia
Helena Molinari é na scrituria y conduturia de programs dl radio. Ara á scrit le liber »Case«, en pert ambienté a Badia, te chël che ara cunta la storia de Chiara, che ciafa tratan le lockdown la motivaziun por cambié, por oje plata y mëte man süa vita danü, zënza lascé indô recorc y afec.
Le liber vëgn presenté dala auturia indoman, sabeda ai 8 d’otober, dales 17:00 ta biblioteca da Pedraces.