La Usc di Ladins

»Laldun le Signur«
Presentaziun dl liber nü de cianties y oraziuns por dlijia y familia, en sabeda ai 28 de jená 2023, dales 14:30, tla dlijia de Badia
Le liber nü é metü adöm da chës 1000 plates sön la strotöra dl »Gotteslob« gnü fora dl 2013. Al tol ite chës 400 cianties, en gran pert ladines, dlungia ales talianes y todësces, spo les oraziuns fondamentales dla Dlijia Catolica, i salms, les litanies, y ince na bela pert de devoziuns y oraziuns por les funziuns te dlijia y te familia. Da ciafé él ince na pert todëscia y taliana cun oraziuns fondamentales. Lapró él 12 retrac a corusc fora dles dlijies dles ploanies, ilustraziuns astrates, y dic y pinsiers te trëi lingac. Le liber ciafaran da cumpré do la presentaziun de Badia, al prisc de 20,00 euro. Al gnará venü te vigni paisc y ince da ciasa a ciasa.

Torchlight Secëda
La Scola de Schi y Snowboard de Urtijëi nvieia a fé pea pra la defileda cun chentli led plu longia dl mond
N se anconta ai 26.01. dala 18:15 japé dla Secëda per jì su deberieda nchin suinsom. Da iló uniràl pià via cun i schi o cun l snowboard y sambën duc cun n chentl a led. L sarà da furné ju per purtoies cueceni, la defileda ne ie perchël nia adateda per prinzipianc:tes.
Ala fin puderan maië da cëina tla utia de Val d’Ana: l vën cunsià de resservé bele danora na mëisa cherdan su l 0471 798643. Pra la utia Val d’Ana saràl nce la aftershow party cun Dj Andrea Sarti y Dj Simon, ulache l ie sambën nvià nce chi che ne à nia fat pea pra la defileda cun chentli. Per ruvé nchin pra utia pòssen se nuzé dl shuttle che pëia via dala 19:00 inant japé dla furnadoia dla Secëda. L servisc ie debant.
La iscrizions vën tëutes su nchin al di dant ti ufizies dla Scola de Schi de Urtijëi y dla Lia dl Turism de Urtijëi.

Senteda generela dl Tublà da Nives
Cun plajëi nvieia la lia culturela Tublà da Nives ala senteda generela, n lunesc ai 23 de jené dala 20:00 tl zënter culturel de Sëlva
Ordn dl di:
• Ntroduzion dl presidënt
• Salut dl’autoriteies
• Relazion dl’atività dla mostres 2022
• Rendicont finanziel 2022 y situazion de cassa
• Prejentazion dl’atività culturela 2023
• Desvalives
Duc ie nviei de cuer.

Wilhelm Senoner te Tublà da Nives
La giaurida sarà n vënderdi, ai 27 de jené dala 18:00 tl Tublà da Nives te Sëlva
I chëunesc, i pic y i plans tla figures de Wilhelm Senoner lecorda n salandron che, ti cialan da ponc de ududa desfrënc, muda for inò volum y forma. La criatività dl artist de Urtijëi ie nasciuda propi ti sasc y ti chëui di crëps, che ti à nce dat vita a si esprescion. Te si scultures iel da udëi n liam sterch danter la persona y la natura, da chëla che l artist à n gran respet ma l ne se tëm nia, ajache son duc pert de ëila. Wilhelm Senoner ie nce n depenjadëur: n valguni de si chedri pëia uni tant via da cie che fova n iede nasciù coche scultura y datrai iel propi la pitures a vester l pont de scumenciamënt per na scultura nueva. La pitura vën tëuta ca coche na crosa dura che cuer l lën de linda mujel y che vën pona dut un. La mostra persunela ie studieda aposta per i salamënc dl zënter culturel te Sëlva y se cunzentrea sun la tematiches dl liam danter la persona y la natura, dl tëmp y la piedies che duc nëus lascion.
La ntroduzion fajerà Greta Langgartner.
La mostra de Wilhelm Senoner sarà da udëi nchin ai 26 de fauré, uni di ora che l lunesc, dala 15:00 nchin la 19:00; de sada y de dumënia sarà l artist nstës prejënt.

Cursc da nodé por scolina y elementara
De forá pëia indô ia i cursc da nodé por i mituns y les mitans dla scolina y dla elementara organisá dala US La Ila
Ai 10 de forá mët indô man cursc da nodé tla nodadoia da La Ila. Chiló de sot le program:
Scolina (nasciüs dl 2017 y 2018)
Livel mesan y progredí dales 13:30 ales 14:15. Livel mesan y prinzipianc dales 14:15 ales 15:00.
Scora elementara
Livel mesan y prinzipianc dales 15:00 ales 15:45. Livel mesan y progredis dales 15:45 ales 16:30.
Le curs vëgn tigní vigni vëndres por indöt 7 iadi, nia tratan l’edema da Carlascé. Le prisc, che tol ite ince l’entrada tla nodadoia, é de 90,00 euro. Iscriziuns: www.uslaila.it.