La Usc di Ladins

Festes da Carnescé tl’Alta Badia
En ocajiun dles edemes da Carnescé vëgnel organisé tl’Alta Badia de plü festes y defilades
Ai 16 de forá dales 14:30 inant vëgnel metü a jí a Calfosch, dlungia le punt tl zënter dl paisc, na festa sön pista cun musiga y animaziun de clowns por pici y gragn. I jogn da Calfosch–Corvara fistidiará da dé fora val’ da bëre y i crafuns da Carnescé. La domënia de Carnescé ai 19 de forá vëgnel spo tigní a Badia la tradizionala »Carnival Cup«: la gara en maschera jödapé dla pista da La Crusc mët man dales 14:00 y düc é inviá da tó pert cun val’ meso de trasport particolar.
Le mertesc ai 21 de forá dales 14:30 él söl program na festa cun defilada dles mascheres jödapé dla pista »Col Alt« a Corvara. Na juria premiará la maschera plü bela y originala y i mituns á ince la poscibilité da se lascé depënje sö le müs. Te chësta ocajiun vëgnel metü a jí ince la »acrobatic show« adöm cun le »Freestyle Team Pirates Alta Badia« y n valgügn bars y eserzizi dl post dará fora da bëre. Ince tl zënter dl paisc da La Ila sarál le mertesc dales 14:30 inant tröpa animaziun cun jüc, musiga y an pó ince se lascé depënje sö le müs y se gode n bun crafun da carlascé y val’ da bëre, che vëgn dé fora dai jogn dl paisc.

Gran defileda da Carnescià a Urtijëi
N juebia grassa ai 16 de fauré dala 3 domesdì. La plu bela mascres vën premiedes
N juebia grassa, ai 16 de fauré, mët la Lia dl Turism de Urtijëi inò a jì la gran defileda da Carnescià. Duc i mutons y la mutans, coche nce i:la granc:des, ie nviei de cuer a fé pea la defileda tres Urtijëi, che pierà via dala 3 domesdì dal hotel Madonna (dlongia l Despar), passerà tres l raion da jì a pe y jirà inant nchin sun Plaza de Dlieja. Tlo uniràl fat na pitla festa cun mujiga DJ y partì ora de bon crafons.
Fé pea nce tu cun ti cumpanies – la plu bela mascres unirà premiedes! Chi che ulëssa fé pea cun na gran grupa o n carët dëssa, per rejons de urganisazion, prëibel se lascé nuté su tla Lia dl Turism, mandan na e-mail a ortisei@valgardena.it o cherdan su l 0471 777600.

Giaurida dla mostra – Estasa dl udëi
Giaurida duman sada ai 11 de fauré dala 16:00 tla galaria Vijion a Puntives
La mostra culetiva »Estasi dl udëi«, cun i artisć y la artistes Rabeah Mashinchi, Johannes Bauer, Hermann Nitsch, Cornelia Lochmann, Andrea M. Varesco, Thaddäus Salcher, Michael Grebner y Rinaudo Nahuel. La ueia de jì a crì mumënc de nia se nsavëi à la persona bele for abù. L ie n fenomenn che ie da abiné te uni cultura y che se tira inant dala preistoria nchin a ncueicundì. La persona à for cris puscibilteies o manieres nueves per ti mucé almanco per n cër’ tëmp ala realtà. Suvënz à chisc mumënc metafisics giapà forma te esprescions artistiches. Y just ajache chësta fases gëura nmaginazions y putënzes nueves, vëniel a s’l dé n’ert che ti lascia lerch a fantajies, ilujions o sëmies. Pervia dla faszinazion de chësta ert uel la galaria Vijion mëter a lum la forma d’ert, che nasc da na gran pascion, che lieia la gran cunzen­trazion ala spontanità.
La mostra »Estasi dl udëi« resterà davierta nchin ai 25 de merz, da lunesc nchin de sada danter la 16:00 y la 19:00.

Mujiga, vin y Carnescià!
La manifestazion vën metuda a jì n lunesc, ai 20 de fauré dala 8 da sëira te Tublà da Nives
»Wein ist mein ganzes Herz« ie l titul la sëira de mujiga y dl ciarcë vins, che vën metuda a jì tl Tublà da Nives, n lunesc de Carnescià.
Christina Lasta y Toni Taschler nes lijerà dant de teles da rì n inuem dla pascion per l vin ntan che i:la musizisć:tes Helga Plan­kensteiner (saxofonn) y Michael Lösch (tlavier) depënj la sëira cun ciantes nueves y vedles dla bona ueia.
La manifestazion vën metuda a jì n lunesc, ai 20 de fauré dala 8 da sëira te Tublà da Nives. Chi che à nteres de unì a ciarcë vel’ bon got de vin servì dal sommelier Elvis Costa y a s’la lascé jì bona cun de bela mujiga dal vif, ie de cuer nvià a se lascé nuté su cuntatan l numer 3337166471 (nce WhatsApp) o ti scrijan a info@tubladanives.it .
La ntreda costa 30 euro. Unide duc n mascra (FFP2 nia lasceda prò :-)

Musical por mituns y jogn
»Chë picia stria« á inom le musical che gnará rapresenté de dezëmber a Al Plan. Al vëgn chirí mitans y mituns, jones y jogn da 10 a 18 agn
En chësc ann vëgnel indô metü en pe n musical por mituns y jogn, plü avisa le toch »Chë picia stria« scrit da Barbara R. Comploi, do la storia »Die kleine Hexe« de Otfried Preußler, cun musiga de ciantauturs ladins. Ara se trata de na produziun dla Uniun Ladins Val Badia. Al vëgn porchël chirí mitans y mituns, jones y jogn da 10 a 18 agn, che á ligrëza da cianté y da jobelné y che ó ester sön paladina adöm cun d’atri y d’atres.
N workshop
Le toch gnará imparé ite tratan n workshop partí sö te plü proes a Al Plan, plü avisa dai 28 d’agost al 1. de setëmber, dai 2 ai 5 de novëmber, ai 18 y 19 de novëmber, ai 25 y 26 de novëmber y ai 2 y 3 de dezëmber, dagnora dales 9:00 ales 17:00 y ai 7 de dezëmber dales 15:00 ales 19:00. Le musical gnará spo rapresenté ai 8, 9 y 10 de dezëmber. Referëntes dl workshop é Sofia Pisching (direziun musicala), Barbara R. Comploi (rejia y coreografia), Maria Frenner (costüms), Nadia Gerstl (scenografia y grafica) y Stefanie Kaneider (organisaziun y coordinaziun).
Iscriziuns y domandes
Le workshop costa 250,00€ a porsona y an pó se scrí ite ala mail musicalalplan@gmail.com anter i 20 de forá.
I posć é limitá. Por informaziuns plü menüdes, pón scrí ala medema e-mail o cherdé sö le 333 2701250.

Multisport y Sportweek 2023: tosc vëgnel daurí les iscriziuns
Ince por chësc isté pita les sozietés sportives dl’Alta Badia edemes de sport y devertimënt por i mituns y les mitans dla elementara y dla mesana. Novité da iniann: Multisport döt le de
Por i mituns y les mitans dala 1. ala 5. elementara vëgnel organisé en chësc ann Multisport All Day, cater edemes de sport y devertimënt cun i referënc Davide Moling, Emanuel Gravino y Andreas Forer en colabo­raziun cun alenadus de d’atres sozietés sportives. An pó ma se scrí ite a dötes cater les edemes, che é 10.07-14.07, 24.07-28.07, 07.08-11.08 y 21.08-26.08, dales 9:00 cina les 15.00 cun marëna. Les iscriziuns pëia ia ai 06.03 dales 8:00 y vá inant cina ai 12.03 online a chësc link https://forms.gle/UeBy9rg88 c914sxk8.
Sportweek por la mesana
Por i jogn y les jones dala 1. cina la 3. mesana vëgnel organisé trëi edemes fora por l’isté cun deplü ativités sportives. I referënc é Andreas Forer, Gabriel Craz­zolara, Emanuel Gravino y Davide Moling. An pó chirí fora öna danter chëstes trëi edemes: 03.07-08.07, 17.07-22.07 y 31.07-05.08, lönesc, mercui y vëndres dales 8:30 ales 12.30 y mertesc, jöbia y sabeda dales 8:30 ales 16:00. Les iscriziuns pëia ia ai 06.03 dales 8:00 y vá inant cina ai 12.03 online a chësc link https://forms.gle/8eb KFBev LXA MH6nX7.