La Usc di Ladins

Mostra de fotografies de Gustav Willeit
L Tublà da Nives nvieia ala giaurida dla mostra de Gustav Willeit (*1975, La Ila) ai 11.03 dala 19:30
La mostra prejënta na lingia plu strënta de si produzion fotografica di ultimi diesc ani.
Da udëi iel cuntredes y details ora dla natura, ma nce de cosses reali­sedes dala persona. Persones nstësses n vëijen mé pueces. L ie nce doi videos da udëi, che ie framënc dla dimen­scion dl tëmp y dla spersa, che ne sta nia ite te vel’ orden; dala dlacia eterna che se dlëiga, ora per deserc de sas apocalitics, a raions industriei y cantieres, nchin a stredes sulëntes, prei, ëures, bòsc y coi, te raions de trasverseda. Gustav Willeit ie bon de mudé – tres reduzions stilistiches y de culëur – luesc cunescui da duta la persones y de i tra­sfurmé te scenars privac. Si lëures se cunzentrea sun l essen­ziel, y coche pra n reset, sparësc te n iede dut chël che desturba l uedl. Cialé y cunscidré la fotografies de Willeit devënta nscila na esperienza per l sëul, n privilegh de ijulazion, da cunfrunté mpue coche l scuté su mujiga cun la cufies tla urëdles, amez a na fola de jënt.
La mostra ie davierta dai 12.03. nchin ai 08.04. uni di ora che delunesc dala 15:00 nchin la 18:00.

Caji de emergënza tla vita da uni di
L KVW de Urtijëi/Runcadic nvieia a n referat cun l dutor Simon Kostner, ai 17 de merz dala 20:00 te calonia a Urtijëi
I caji de emergënza tla vita da uni di possa vester trueps y suvënz ne sàn nia co ti jì permez.
Co recunëscen pa n cajo de emer­gënza?
Ciuna reazion ie pa la drëta?
Tl referat cun l referënt dut. Simon Kostner ti cialons plu avisa ala diesc emer­gënzes saniteres plu gene­reles tla vita da uni di, coche per ejëmpl l bót y l bót al cuer, de majera sanghedes, mel de San Valantin, nescia, safuieda y n.i.

Teater »Meses verités«
Teater da rí dla Uniun dl Teater da San Martin de Tor. La premiera é le vëndres ai 17 de merz
La Uniun dl Teater da San Martin inviëia ales rapresentaziuns dl toch »Meses verités« – teater da rí te döes perts, de Alan Ayckbourn. Sön pala­dina jobelnëia Daniel Schanung (Greg), Teresa Planatscher (Ginny, süa chestiana), Christian Clara (Philip, amant de Ginny) y Melanie Clara (Sheila, fomena de Philip). La regia é de Matteo Rubatscher.
La pröma rapresentaziun é en vëndres ai 17 de merz dales 20:00; le teater vëgn spo ciamó porté dant la sabeda ai 18, le mercui ai 22 y la sabeda ai 25 de merz, tres dales 20:00, sciöche ince la domënia ai 26 de merz dales 15:00.
Prenotaziuns al 0474 646030.

Invit ala »Mariapoli« de Südtirol
Le Movimënt di Focolars de Südtirol inviëia ala »Mariapoli«, dai 28 d’aurí al 1. de ma a Cadine (TN), söi fostüs dla fondadëssa Chiara Lubich
Le Movimënt di Focolars é n movimënt laich, che á sciöche fin l’unité y la pêsc danter les popolaziuns. Al é gnü metü sö l’ann 1943 da Chiara Lubich, nasciüda dl 1920 a Trënt y morta l’ann 2008 a Rocca di Papa. Öna dles majeres incuntades vëgn tlamada »Maria­poli«.
Do che la »Mariapoli« é tomada fora plü agn por gauja dl Covid, garetera indô: dai 28 d’aurí al 1. de ma a Cadine, tla provinzia de Trënt, olache an podará ince vijité chi posć olache le Movimënt di Focolars é nasciü. La »Mariapoli« da iniann é sot al motto »Sehnsucht nach dem Wesentlichen – Fermarsi, ascoltare, dialogare – Se archité y ascuté sö«.
Al é na formaziun spirituala, na ocajiun por s’incunté, raforzé raporc, aldí teste­monianzes di partezi­panc y vire momënc d’aurela cörta. Por tó pert, él da s’anunzié anter le 31 de merz pro la familia de Giovanni y Resi Craffonara da Rina al 333 6211199, che dá ince informaziuns plü menüdes sön l’evënt y la prenotaziun.