La Usc di Ladins

RECLAM LITAL
L presidënt Kompatscher te Gherdëina
Ai 19 de utober, dala 18:00, ie duta la populazion nvieda a na ancun-teda cun i:la candidac:tes dla SVP, tla Cësa de Chemun a S. Cristina
Cun plajëi nvieia la SVP Ladina a na ancunteda cun si candidac y candidates per la veles dl Cunsëi Provinziel: Philipp Ach-ammer, Daniel Alfreider, Arno Kompatscher, Manfred Vallazza, Anna Künig y Magdalena Perwanger. Da dedò puderàn mo s’la ciaculé mpue pra n bon aperitif.

Giaurida dla mostra de Gregor Prugger – »N pitl mond«
Duman sada ai 14 d’utober uniràl giaurì tla galaria Vijion a Puntives, dala 6 da sëira, na mostra de Gregor Prugger, che nes prejenterà d’uni sort de pitla scultures
Dl artist Gregor Prugger cunescions bele si gran ardimënt, de scuvrì for inò puscibiliteies artistiches nueves. Ma la mostra »N pitl mond« nes geura na ududa ënghe n iede te si pitla cria­zions. Scultures d’uni sort, sibe tla tecnica che nce tla forma y dutes de mëndra dimenscions. For ino à Gregor crià danterite de tel series d’opres particuleres. L n ie d’uni sort, danter de teles ironiches nchin a chëles plu sceries, ma for luna ora si gran genialià da scultëur. L’ispirazion per chësta pitla opres abina Gregor scialdi tla natura. Suënz iel vel’ ram o vel’ furmazion naturela a ti descedé la fantajia. Y che la fantajia ne ti mancia a Gregor nia, chël vëijen te chësta mostra a Puntives. La mostra »N pitl mond« de Gregor Prugger resta davierta dai 16 d’utober nchin ai 11 de nuvëmber, dal lunesc ala sada danter la 4 y la 7 domesdì.

Consulënza positiva di conflic
Na manira por mioré la cualité de nosta vita. Na serada cun Simon Kostner, ai 19 d’otober dales 20:00, te biblioteca a La Ila
La Consulënza positiva di conflic pëia ia dala convinziun che vigni porsona é sciöche na mineora plëna de peres prezioses, che ëra instëssa pó porté a löm. Söla basa de chësta vijiun positiva dla porsona, mëtera a desposiziun deplü stromënc, che vignun y vignöna pó adoré por afronté les piceres y granes dificoltés dla vita da vigni de, te nüsc raporc cun nos instësc y cun les atres porsones.
Le Consëi de Formaziun de Badia organisëia na serada sön chësta tematica, en jöbia ai 19 d’otober dales 20:00 te biblioteca da La Ila. Referënt é Simon Kostner.

Workshops: Uniun fej la forza!
Lauré tles uniuns por fá crësce entusiasm y motivaziun
Ester te na uniun é na cossa che dá dër tröp, ince sce al ne é nia dagnora saurí. Al é ri da mëte adöm n gröm de ces. Avisa surastanc y mëmbri dles uniuns á porchël le gran compit da porvé da trá fora le potenzial creatif y le savëi de n grup. Al ó ester competënzes por mené sentades te na manira efiziënta, por motivé y ativé porsones, por savëi co evité o stlarí conflic. Kathia Nocker y Kevin Hofer, intrami esperc te chësc ciamp, dará inant so savëi ai 12 y 17 de otober (Kathia Nocker) a San Martin de Tor tl salf di stödafüch, o ince ai 19 y ai 24 de otober (Kevin Hofer) a La Ila tla Ciasa dla Cultura. Les serades é gnüdes ponsades a na moda che sides i termins co ince i posć é flessibli; ares mët man dales 19:30, vëgn tignides por todësch y é debann. Prenotaziuns al 0474 524552 o sozialsprengel.gadertal@bzgpust.it

Che este pa tö?… Tüa möta!
Demënza tla vita da vigni de: ai 21 d’otober n domisdé de informaziun te Ciasa de Palsa a San Martin, cun informaziuns, consëis y na testemonianza direta
La demënza é öna dles diagnoses che vëgn dada le plü gonot a feter le 75% dles porsones danter i 65 y i 90 agn. Mo ince jënt plü jona pó gní atocada da chësta maratia che cambia la vita dla porsona sides te familia co cun i amisc y ince tla sozieté. Adöm a esperc y profescionisć gnarál porvé da dé respostes al gröm de domandes che pó gní sö te chëstes situaziuns. Al gnará ince mostré sö les poscibilités de aiüt, i sostëgns y l’assistënza che é da ciafé.
Gregorio Rungger, primar dla neurologia tl spitol da Bornech, baiará dles gaujes y di sintoms, sciöche ince dl decurs dla maratia y dles cures.
Maria Tasser, infermiera tla »Memoryklinik« portará dant co se comporté y co acompagné porsones cun demënza, sciöche ince co afronté sentimënc negatifs.
Maddalena Trebo – Sorvisc infermieristich, Helga Trebo – Sorvisc assistënza a ciasa y Michela Fiung – infermiera te Ciasa de Palsa, spligará l’assistënza, i aiüc y i sostëgns pitá tla Val Badia.
Na porsona atocada, adöm a süa möta baiará de süa esperiënza.
Döt chësc en sabeda ai 21 de otober dales 14:00 ales 17:00 te Ciasa de Palsa Ojöp Frëinademetz a San Martin de Tor. Düc é dër bel inviá. Organisaziun: Comité de Raiun Val Badia en colaboraziun cun l’Aziënda Sanitara da Bornech.

Teater

• 
•  

View the embedded image gallery online at:
https://www.lausc.it/manifestazions-y-evenc/25218-manifestazions-atuales-speziales#sigProId78a2603093

a La Pli de Mareo
Sëgn ésera tan inant: l’Uniun dal Teater presentëia la comedia »Le boxer« de Otto Schwartz y Carl Mathern sot ala regia de Tone Palfrader. Premiera cun renfrësch édl ai 20 d’otober dales 20:30, spo vára inant ai 28.10. dales 20:00, ai 29.10. dales 15:00, ai 4.11. dales 20:00 y ai 5.11. dales 15:00
Le toch »Der Meisterboxer« é gnü metü tl ladin da Anna Palfrader. I jobleri é Alfons Facchini, Sabine Facchini, Simon Willeit, Samantha Pallua, Elmar Winkler, Franz Rigo, Heidi Ploner, Evelyn Pedevilla, Alex Daverda y Anita Rigo. Da se dé fora desco n boxer che davagna döt é na bela fufula por s’un sciampé da ciasa, mo canche al é vera­mënter le dër campiun che vëgn adalerch, spo pón ma plü speré che al s’la caves cun n edl bröm.
Les chertes pó gní apostades danfora danter les 17:00 y les 20:00 tres le nr. tel. 389 8158382, y vëgn venüdes n’ora dan le teater.

»Leadership y management«
Consëis pratics por la gestiun di colaboradus: n workshop ai 7 y 8 de novëmber a Badia
Le Consëi de Formaziun de Badia mët a jí n workshop dal titul »Leader­ship y management« cun le dot. Aldo Menini, tres l’organisaziun Telos. Le work­shop vëgn tigní le mertesc y mercui ai 07.11. (9:30 – 17:30) y ai 08.11.2023 (9:00 – 17:00), tla Ciasa J.B. Runcher a Badia.
I partezipanc imparará les com­petënzes prinzipales che vá debojëgn por la gestiun y le coordinamënt dl rendimënt de sü colaboradus. An imparará da tó dezijiuns strategiches y da ti dé na impostaziun orien­tada ala soluziun di problems.
Informaziuns y iscriziuns cina ai 2 de novëmber, ala misciun mail cf.badia@rolmail.net

Genus:Dredia cun 12 artisć:tes jëuni:es
Giaurida ai 19 de utober - Cunlaurazion danter Tublà da Nives y SKB
La mostra »Genus:Dredia« se tol dant de se dé ju cun chësta tematica y de ejaminé la fazion dla furmazion de tlaps (»Schwarmverhalten«). Per chësc fin iel unì nvià ite tres n cuncors 12 artisć:tes che à si ravises te Gherdëina o tla Val Badia. Ora che unì dai medems luesc, nes nteresséiel dantaldut la vijions dla generazions plu jëunes (sot ai 35 ani) che viv for plu y plu oradecà o che fej na pert de si furmazion te luesc furesć. La generazion jëuna, prejënta si idées y opres cun mesuns desferënc, coche ogec, nstalazions, depënc, dessënies y video.
L mët ora Anna An­vidalfarei, Manuel Bauer, Caroline Comploi, Manuel Dander, Felix Mahlknecht, Damian Piazza, Julia Prugger, Leonora Prugger, Elisa Rungger, Céline Silbernagl, Valeria Stuflesser y Tobias Tavella. La mostra ie unida cureda da Greta Langgartner y Lisa Trockner. Urganisadëures ie l Tublà da Nives n cunlaurazion cun l Südtiroler Künstlerbund. La giaurida ie n juebia ai 19 de utober dala ot da sëira y la mostra sarà da udëi nchin ai 18 de nuvëmber uni di (ora che de lunesc), dala 3 nchin la 6 domesdi.