La Usc di Ladins

Le tru sfadius do n inzidënt o na diagnosa
Edema dla Sanité te Mareo: en lönesc ai 23 d’otober dales 20:00 a Al Plan la pröma serada cun testemonianzes de porsones
La Edema dla Sanité vá tla sostanza bele la pröma sëra, en lönesc ai 23 d’otober dales 20:00, te salf dla Raiffeisen a Al Plan.
Co ésera pa do n inzidënt, can che to corp ne é nia plü sciöche denant? Varëscimo da chësta maratia? Can sarunse mo indô bun da ester sciöche denant? A chëstes domandes respogn trëi porsones che á albü te süa vita maraties o inzidënc nia da püch. Sot al titul »Le tru sfadius do da n inzidënt o do da na diagnosa de na burta maratia« aldiarán la testemonianza de Wolfgang Pisching, Franz Josef Frontull y Manuel Kehrer. Moderaziun: Diego Clara.

Les trëi dimenjiuns dla sanité
Edema dla Sanité te Mareo: ai 24 d’otober baiará a La Pli le coach Paul Felix Rigo
Le mertesc ai 24 d’otober dales 20:00 vá inant l’Edema dla Sanité te ciasa dles uniuns a La Pli, cun le coach diplomé, mentor y consulënt Paul Felix Rigo. Al é tres ciamó na tendënza deslariada fora da limité le conzet de sanité ma ala pert fisica. An ne dess indere nia se desmentié che la sanité é cotan deplü co ma l’integrité dl corp y ch’ara á ince na dimenjiun importanta a livel sozial y psicologich. Sot al titul »Gesundheit in 3D« gnarëise en chësta sëra tuc para a fá na picia roda tres chëstes trëi dimenjiuns dla sanité fora y les faziuns ch’ares á öna sön l’atra. I ciafarëis informaziuns sön argomënc sciöche le bëgnester dl corp, la sanité psichica, la suravënta dl stress y la forza mentala.

Vire cun na maratia cronica
Edema dla Sanité te Mareo: co él pa da vire cun na maratia cronica? Respostes ciafon ai 26 d’otober a Al Plan
Co che ara é da vire cun na maratia cronica, gnarán lassura la jöbia ai 26 d’otober dales 20:00, tl salf dla Raiffeisen a Al Plan. Te chësta mësa torona baiará de sües esperiënzes Flurina Comploi, atocada da sclerosa multipla, le dr. Gregorio Rungger – primar de neurologia a Bornech, y la dr. Helga Call dl Sorvisc psicologich da Bornech.

Acompagné canche la vita vá a piz
Edema dla Sanité te Mareo: le vëndres ai 27 d’otober dales 14:00 ales 18:00 él te ciasa dles uniuns a La Pli n curs de »Ultim aiüt«
La fin dla vita y le morí o tó comié de nüsc parënc, amisc y vijins nes fej gonot sintí perplesc, ajache al é jü mancia le savëi sön co acompagné ala mort. Te chësc domisdé él Margot Pizzinini, Edith Dapoz y Monica Trebo che trasmët les conescënzes de basa y che dá ince coraje da ti sté dlungia a chi che mör, savon che l’atenziun é ci che düc nos adorun le plü ala fin dla vita. Le curs é limité a 12 porsones. Al é da s’anunzié anter i 26 d’otober al numer 0474 586128 (dales 8:00 ales 9:30).

S’la rí é la miú medejina
Edema dla Sanité te Mareo: a Rina él ai 27 d’otober na serada de musiga y cabaret cun Markus »Doggi« Dorfmann
»S’la rí é la miú medejina«: chësc é le motto dla ultima serada dl’Ede­ma dla Sanité te Mareo. En vëndres ai 27 d’otober dales 20:00 s’incunton tl salf dles mani­festaziuns da Rina. Iló rovarál adalerch le musizist y cabaretist Markus Dorfmann alias »Doggi«. Te na serada cun tröpa musiga y ince umor, portarál dant sües cianties plü da rí, abinades adöm te 20 agn da ciantautur. An aldiará porchël cianties sciöche »Jesolo«, »Tatoo«, »Wellness­wochen­ende«, »Senta«, Dor Franz vom Grödnertol« y tröpes d’atres.
Markus Dorfmann á tigní so pröm conzert cun 13 agn y á dé fora bele cotan de CD’s.

Teater a La Pli de Mareo
Insnöt éra tan inant: l’Uniun dal Teater presentëia la comedia »Le boxer«

• 
•  

View the embedded image gallery online at:
https://www.lausc.it/manifestazions-y-evenc/25308-manifestazions-atuales-speziales#sigProIda7b34484e4

de Otto Schwartz y Carl Mathern sot ala regia de Tone Palfrader. Premiera cun renfrësch édl insnöt ai 20 d’otober dales 20:30, spo vára inant ai 28.10. dales 20:00, ai 29.10. dales 15:00, ai 4.11. dales 20:00 y ai 5.11. dales 15:00
Le toch »Der Meisterboxer« é gnü metü tl ladin da Anna Palfrader. I jobleri é Alfons Facchini, Sabine Facchini, Simon Willeit, Samantha Pallua, Elmar Winkler, Franz Rigo, Heidi Ploner, Evelyn Pedevilla, Alex Daverda y Anita Rigo. Da se dé fora desco n boxer che davagna döt é na bela fufola por s’un sciampé da ciasa, mo canche al é vera­mënter le dër campiun che vëgn adalerch, spo pón ma plü speré che al s’la caves cun n edl bröm.
Les chertes pó gní apostades danfora danter les 17:00 y les 20:00 tres le nr. 389 8158382, y vëgn venüdes n’ora dan le teater.

Dependënzes y prevenziun
En mercui ai 25 d’otober él tla Ciasa Runcher a Badia na sëra de informaziun por geniturs
Le Consëi de formaziun de Badia mët a jí en mercui ai 25 d’otober dales 18:00 tla Ciasa Runcher a Badia na sëra d’informaziun por geniturs, sot al titul »Dependënzes y preven­ziun«. I adolescënc é te na fasa de svilup complessa a livel fisiologich, psicologich y sozial. Ara se trata da ti dé forza ala identité personala y al’autostima por la valorisaziun de se instësc. Te chësc contest dess la pre­venziun da depen­dënzes ester n prozes de reflesciun.
Al gnará dé informaziuns generales söles sostanzes, baié dl’importanza dla familia sciöche post de dialogh y de condivijiun, dl prozes de autonomia y de svilup di jogn y dles jones. L’obietif é na reflesciun te n cërtl de informa­ziuns tleres, por na miú conescënza dla tematica.
Referënc dla sëra é la psicologa Laura Sternbach y le psicoterapeut Luca Guerrato – che laora intrami pro »La Strada – Der Weg«.

ATP Challenger 50
Dai 22 nchin ai 29 de utober uniràl a s’l dé - tl zënter dal tennis a Runcadic - l turnoi di ëi Sparkasse ATP Challenger 50 Val Gardena Südtirol. N gaujion dl aniverser di 25 ani dla »Internazionali Tennis Val Gardena«, sarà la ntredes debant
L Challenger di ëi vën metù a jì nce chëst ann tl zënter dal tennis a Runcadic, ntan l’ena dai 22 nchin ai 29 de utober. L turnoi di ëi ruva n chëst ann a si 14ejima edizion y l sarà inò n niveau scialdi aut a livel mundiel.
N sada ai 28 de utober saràl la semifineles dl singul y la finela dl dopl. N dumënia ai 29 de utober pona la finela dl singul.
Cun plajëi nvieia l Tennis Club Gherdëina duc y dutes a unì a cialé la partides y lascia al savëi che n gaujion dl aniverser di 25 ani dla »Internazionali Tennis Val Gardena« sarà duta la ntredes debant.