La Usc di Ladins

ATP Challenger 50
Nchin a n dumënia 29 de utober jiràl inant - tl zënter dal tennis a Runcadic - l turnoi di ëi Sparkasse ATP Challenger 50 Val Gardena Südtirol. N gaujion dl aniverser di 25 ani dla »Internazionali Tennis Val Gardena«, ie la ntredes debant
L Challenger di ëi che à metù man n lunesc ai 23 de utober ruva n chëst ann a si 14ejima edizion y pieta inò n niveau scialdi aut a livel mundiel.
Ncuei, vënderdi ai 27 de utober dala 11:00 saràl i cherc de finela di singui y la semifineles dl dopl, n duman sada ai 28 de utober dala 11:00 la semifineles dl singul y la finela dl dopl. Da dedò saràl na festa de iubileum n ucajion di 25 ani dla »Internazionali Tennis Val Gardena« per duc i presënc. N dumënia ai 29 de utober puderàn ti cialé ala finela dl singul, dala 11:00.
Cun plajëi nvieia l Tennis Club Gherdëina duc y dutes a unì a cialé la partides.

Gran conzert de orghegn
En sabeda ai 28 de otober te Chino de Cianacei da les 4 domesdì l’Union di Ladins de Fascia sporc na bela ocajion de musega de calità
Orghen da botons e da tastiera, reta, diatonica, bandoneon e orghen triestin se compagna e se enterza tel projet » 4 Bellows 4 Tales«: n viac maraveous te la storia, ti sons, te la tradizions e te l’evoluzion de chisc strumenc da mantesc. Da musega populèra e balcanica a sonoritèdes de l’Argentina e del jazz, con efec che crea atmosferes evocatives de gran sugestion.
L é chest che ne met dant n quartet de strumentisć de gran valuta che vegn dal raion anter Friul e Slovenia: Polona Tominec, Stefano Bembi, Zoran Lupinc e Maurizio Marchesich i à duc cater n curriculum da marevea, con esibizions su la paladines de maor nonzech e pesć de livel internazionèl.
I à metù su n Zenter de formazion per sonadores de orghen de ogne età e capazità te la Slovenia, con filiales ence tel Friul. En sabeda domesdì duc à l met de i scutèr debant te Chino de Cianacei. de gra a l’Union di Ladins de Fascia che sporc chest conzert en ocajion de sia Festa del Rengraziament. Ve speton duc da les 4 domesdì: no ve perdé chesta ocajion!

»Indô

• 
•  

View the embedded image gallery online at:
https://www.lausc.it/manifestazions-y-evenc/25367-manifestazions-atuales-speziales#sigProId4e116072d7

(ma) scenes« a La Ila
L’Uniun Teater La Ila inviëia düc canc a gní a ti ciaré al toch »Indô (ma) scenes«, te Ciasa dla cultura a La Ila. Ai 4, 5 y 8 de novëmber
I jobleri y les jobleres Alessandro Bonfanti, Jessica Flöss, Marco Moscon, Milena Obwegs, Andreas Peccei, Andy Pizzinini, Roland Pizzinini, Roberta Rinna, Sabine Rudiferia, Susann Tavella deboriada cun Erika Castlunger á arjigné ca n valgünes scenes che sará da odëi chisc dis: sabeda 04.11., domënia 05.11. y mercui 08.11., tres dales 20:30. tla Ciasa dla cultura a La Ila. Dles löms se crüzia Luca Pizzinini. L’entrada é debann y al ne vá nia debojëgn da prenoté.

»Leadership y management«
Consëis pratics por la gestiun di colaboradus: n workshop ai 7 y 8 de novëmber a Badia
Le Consëi de formaziun de Badia mët a jí n workshop dal titul »Leader­ship y management« cun le dot. Aldo Menini, tres l’organisa­ziun Telos. Le workshop vëgn tigní mer­tesc y mercui ai 07.11. (9:30 – 17:30) y ai 08.11.2023 (9:00 – 17:00), tla Ciasa J.B. Runcher a Badia. I parte­zipanc imparará les com­petënzes prinzipales che vá debojëgn por la gestiun y le coordi­namënt dl ren­dimënt de sü colabo­radus. An imparará da tó dezijiuns strate­giches y da ti dé na impostaziun orientada ala solu­ziun di problems.
Informaziuns y iscri­ziuns cina ai 2 de novëmber por mail a cf.badia@rolmail.net

La »Upcycling Band« a Toblach
Le conzert cun stromënc de percusciun realisá cun materiai reziclá é n proiet de Max Castlunger che sará da aldí adöm a Mirko Pedrotti, Manfred Gampenrieder y Georg Malfertheiner
En sabeda ai 28 d’otober 2023 dales 18:00 storj pro a Toblach tl zënter cultural Gustav Mahler le conzert straordinar che nasc da na idea ino­vativa de Max Castlunger da San Martin de Tor da realisé stromënc de percusciun cun de vigni sort de materiai coiüs adöm dal rofodam y dal monn dal laur.

»Melodies che liëia«
Insciö se tlama le proiet dles Musighes da La Ila y da Corvara–Calfosch, che vá a piz cun n gran conzert, chësta sabeda ai 28.10. a La Ila
»Melodies che liëia« é le titul dl proiet metü a jí en chësc altonn da pert dla Müjiga La Ila y dla Müjiga Calfosch-Corvara.
Al se stlüj jö cun n gran conzert d’altonn, en doman sabeda ai 28 d’otober dales 20:00, tla Ciasa dla cultura a La Ila. Indöt sarál sön paladina bëgn 70 musicontri dles döes uniuns, sot ala bachëta de Hans Pircher. Al gnará porté dant n program rich, metü adöm da toc classics, moderns y tradi­zionai. En ocajiun dl conzert d’altonn gnarál ince surandé les medaies de mirit y de prestaziun por i mëmbri dles musighes da La Ila y da Calfosch-Corvara.