La Usc di Ladins

La diversité sciöche arichimënt
Le Consëi de formaziun de Badia inviëia a na mësa torona cun trëi ghesć particolars, en vëndres ai 10 de novëmber dales 19:30, tl Saj.un a La Ila
»Le coraje da ester se instës – 3 stories de vita •stra•ordinares« é le titul dla serada che vëgn metüda a jí dal Consëi de formaziun de Badia, en vëndres ai 10 de no­vëmber dales 19:30, tl Saj.un a La Ila (Ciasa dla cultura, alzada -2). Ghesć dla sëra é Moritz Demetz, Roland Flöss y Tobias Stampfer, che cunta süa esperiënza.  La moderaziun é de Jasmin Ferdigg.

Cunzert de »The Royal Wind Music«
I Jëuni de Mujiga Gherdëina nvieia al terzo cunzert de chësta sajon de cunzerc, n merdi ai 7 de nuvëmber dala 20:00 tla dlieja de S. Cristina
L ensemble metù adum da de plu musizisć y musizistes nternaziunei:les à n gran repertoire dl’epoca d’or dla Poliphonia. Metù su tl 1997 da Paul Leenhouts, àl daniëura apasciunà chëi che scota su cun si mujiga strumentela che va dai ani 1520 nchin al 1640. L ensemble ie cunesciù a livel nternaziunel per vester bon de comuniché te na maniera direta cun l publich.
Lascëve tré pea ntan chësc cunzert che à coche prugram »The Orpheus of Amsterdam« – i miëur-lëures de Jan Pieterszoon Sweelinck, cun Ballo del Granduca SwWV 319, Aspasia   Nasopoulu – Dance for the Orpheus van Amsterdam (2021), Pseaume 77–SwWV 77, Marchans qui traversez tout le rivage More–SwWV 224, Echo fantasia – SwWV 275, Onder een linde groen – SwWV 325, Group improvisation – Chain reaction, Yeux, qui guidez mon âme – SwWV 231, Fantasia G3 Fuga 7 toni – SwWV 268, Malle Sijmen – SwWV 323, Ab oriente venerunt magi – SwWV 153, Fantasia Crommatica – SwWV 258.

Batadù di Artejans n pension de Gherdëina
Per finé via l’atività de chëst ann, mët i Artejans n pension de Gherdëina a jì n domesdì de batadù, n sada ai 11 de nuvëmber dala 14:00 tla sala Raiffeisen tl chemun de Santa Cristina
Duc chëi y dutes chëles che cherta gën ie nviei a fé pea, per passé n bel domesdì de aurela curta, cartan y s’la cia­culan. Nce na pitla marënda saràl da giapé, y i:la miëures o i:la plu fertunei:des puderà vëncer de biei pesć.
N possa se nuté su n chël di dala 14:00, da paië ite iel 15,00 euro.
La lia di Artejans n pension se ncunforta sun vo!

Corvara: marcé dl patüc fat a man
Creativité, savëi y fantasia é trëi parores che an pó adoré por definí en cört le »Marcé dl patüc fat a man«, che gnará a s’al dé ai 12 de novëmber a Corvara
La Uniun dles Ëres da Corvara mët a jí en domënia ai 12 de novëmber dales 10:00 ales 17:00 le »Marcé dl patüc fat a man«, tl salf dles manife­staziuns da Corvara.
Al gnará metü fora patüc fat a man da pert de 30 esposituries y espositurs. Na pert de ci che vëgn trat ite i jará al »Wünsche­wagen« dla Crusc Blancia – che ti ejaudësc i »ultimi dejiders« a porsones che s’arjigna da morí.

Mostra speziela: Balsamo Stella
Guido Balsamo Stella: L urientamënt nuef dl’ert te Gherdëina 1924-1927
Che Gherdëina possa auzé ora artisć y artistes a livel nternaziunel dla prima metà dl XX ejim secul ie nce de gra al artist Guido Balsamo Stella. Dal 1924 al 1927 ie ël stat diretëur dla doi Scoles d’ert de Urtijëi y Sëlva, purtan nsci pro a dé n urientamënt defin nuef tl’ert dl ziplé de Gherdëina.
Te chësta mostra uni­ràl cunfruntà l’opres dl Maestro Balsamo Stella cun chëles de si nsenianc y sculeies dla Scoles d’Ert.
L merit de Balsamo Stella coche renuvadëur dl’ert te Gherdëina vën auzà ora cun na mostra speziela dl Museum Gher­dëina ntan l mëns de nuvëmber. La giaurida ie n juebia ai 9 de nuvëmber dala 18:00 tla Lia Mostra d’Ert sun plaza S. Antone a Urtijëi y resterà da udëi nchin ai 1 de dezëmber, dal lunesc al vënderdi, 14:00–18:00. De sada iel daviert danmesdì, 10:00–12:00, cun vijita meneda dla curadëssa Danila Serafini.
Info: www.museumgher deina.it, tel. 0471 707554

Le Rait de San Linert dles valades ladines y de Südtirol
La 23ejima ediziun dl Rait de San Linert vëgn tignida la domënia ai 5 de novëmber; bele la sabeda sëra podarán aldí musiga ladina cun deplü grups dl post
En chësc ann mët man le Rait de San Linert bele la sabeda ai 4 de novëmber cun n conzert di grups ladins »L vin & l din«, »Alexander dal Plan« y »Ethnic Techniques«. Ai sará da aldí dales 18:30 inant, tl tendun dlungia la Ciasa J. B. Runcher, olache al vëgn ince dé fora da mangé. La domënia ai 5 jará spo inant la festa cun la santa mëssa dales 9:00 tla dlijia de Badia, y dales 10:45 podarán odëi la defilada da Pedraces cina a San Linert. En chësc ann tol pert plü co 100 ciavai haflinger y norics dles valades ladines y de döt Südtirol, che gnará spo benedis da siur Degan pro le paiun. Al sará ince musighes y i grups dl bal popolar che abeliará la festa; an podará odëi i ciars infornis sö y güces cun guanc da zacan. Dales 13:00 él söl program n spetacul da pert de trëi scuadres dl rait »Oswald von Wolken­stein« y la festa jará inant cun musiga sides tla Ciasa dles Uniuns a Badia che tla tënda, olache les uniuns di paurs, i stödafüch y la musiga de Badia dá fora spezialités gastro­nomiches. La Rait vëgn ince mostré en streaming sön le canal Facebook dl’Alta Badia y la manifestaziun vëgn tignida ince sce al ess da ester bur’ tëmp.

Cun crëta te n monn nü
Referat cun Manfred Schweigkofler, che baia di cambiamënc de nosta generaziun y de ci che les desfides nöies se damana. Ai 8 de novëmber te Ciasa de palsa
I viun te tëmps nia saurisc y tröpes porsones á tëma dal dagní. Sunse mo nos veramënter l’ultima generaziun? O sunse nos la pröma generaziun? La pröma generaziun de n monn nü, che á tan de poscibilités sciöche degügn d’atri dan da nos. Sambëgn messunse im­pormó s’ausé a chësc monn nü, ala inteligënza artifiziala y al savëi digital. Porchël sunse ince te na »crisa«, deache crisa n’ó nia dí ater che: cambiamënt. I sun te n cambiamënt adincuntra an monn nü, che pó gní bun, sce i ne se desmentiun nia ci che se fej ester porsona: avëi respet, empatia, confi­dënza, reconescënza, emoziun y pasciun. De chësta tematica y dl’importanza dla pasciun y motivaziun por le laur che an fej, baia Manfred Schweig­kofler, en mercui ai 8.11.2023 dales 19:30 te Ciasa de palsa Ojöp Frëinademetz a San Martin de Tor. Schweigkofler é espert d’ert, cultura y comuni­caziun. Al á lauré 7 agn pro RAI Südtirol, 12 agn él ste diretur dl »Stadttheater« da Balsan y 20 agn alalungia ál coordiné festivals internazionai. Por Südtirol ál organisé dui iadi l’esposiziun mondiala. Düc é bel inviá da gní a ascuté sö. Le referat é por todësch.

Fineles dl ITF te Sëlva
L turnoi cun montdepesć de 15.000$ di ëi ie ruvà ala fin. Dates y orares dla fineles de dopl y singul. Ntreda debant
L Zënter dal Tennis de Sëlva sarà ncuei vënderdi y duman sada l palch dla fine­les dl turnoi te tennis ITF di ëi, cun n mont­depesć de 15.000$. La finela dl dopl ie ncuei vënderdi ntëur la 17:00, do la semif­ineles dl singul.
La gran finela dl singul sarà duman sada sada dala 11:00. La ntreda ie debant, duc y dutes ie nviei:des a unì a cialé pro.