La Usc di Ladins

Pest de poejies ladines »Angelo Trebo«: escrizion dla diejima edizion
Termen per mené ite les poejies: 15 de merz 2024
Al é n concurs de poejies davert a duc chi che scriv per ladin, metú su dl 1997 a San Martin de Tor. Con l’edizion dl 2012 é l pest trienal vegnù daurì a dutes les variantes ladines y i idioms ladins dl raion dles Dolomites, cie che à porté spo tles ultimes cater edizions a na maioura partezipazion da pert de autoures y autours. L’edizion nueva, segn daverta, é chela dl 2024. La premiazion é preveduda per mei 2024.
Criters y condizions
Da prejenté él – ence en chest iade – anter trei y cinch poejies. I prums trei posć é ciariés con pesć monetars de 500,00, 300,00 respetivamenter 200,00 euro. Per tò pert él da paié ite sun l cont bancar IBAN IT41H 08010 58830 000 304000455 intesté a l’EPL-Ert por i Ladins la comiscion de partezipazion de 20,00 euro.
Vigni autour:a prejenteia les poejies te cinch copies, les contrassegneia con n pseu­donim y ajonta laprò te na mendra cuverta scluta si dac anagrafics y l’atestazion dl versament dla comiscion de partezipazion. Sun la mendra cuverta scrivel:ela si pseudonim.
La miscion per mené ite o dé ju a man l material per tò pert al concurs – anter l 15 de merz 2024 – é:
EPL-Ert por i Ladins, Pest »Angelo Trebo«, str. Stufles 20, 39030 San Martin de Tor/San Martino in Badia, BZ.


Emoziuns da Nadé tl’Alta Badia
Tratan le tëmp d’Advënt y da Nadé se trasformëia i paisc dl’Alta Badia te posć da na atmosfera sintida particolarmënter
A La Val gnarál metü a jí dal 01/12 ai 07/01 la Roda dles cripeles. Ala se trata de na roda fora por le paisc, olache an podará amiré te deplö fraziuns cripeles de deplö grandëzes. Implö sarál vigni vëndres y sabeda dales 18:00 inant l’uniun dl sport che dará fora val’ da bëre te plaza de comun, adinfora di 16/12 mo porchël ai 25/12. La plaza de dlijia a Calfosch fajará da cornisc ai apuntamënc »Adöm te plaza«, plö avisa ai 5 y 19 de dezëmber y ai 2 de jená, olache al gnará ince metü fora cripeles fates a man da artejans dl post. Te chëstes ocajiuns gnarál dé fora dales 16:30 ales 18:30 val’ duciaria y boandes cialdes y an podará ascuté sö les plö beles melodies dl Nadé. Pro le prüm apuntamënt gnarál San Micurá a partí fora scincundes a düc i mituns. Ince Badia luminará tl plü bel abelimënt da Nadé y al tla picera ciasota dlungia dlijia a San Linert, gnarál dé fora val’da bëre adöm al’uniun di ustis de Badia, la jonëza da paur y i jogn dl paisc cun musiga tratan i apuntamënc preodüs le 8, 15 y 22 de dezëmber dales 18:00 inant. Le Paisc da Nadé a San Ciascian, davert dai 7-10.12, dai 13-17.12 y dai 20.12 ai 07.01 ti dá la poscibiité da spaziré fora por le paisc y descovrí sön les tofles metüdes fora les usanzes ladines tratan le tëmp d’Advënt y da Nadé sciöche ince sgolosé val’ duciaria y se bëre val’de cialt pro les üties dales 16:00 ales 19:00. Al gnará ince metü fora deplö cripeles fates a man da artejans dl post y val’sëra sarál ince grups locai che porta dant musiga y cianties, sciöche ince San Micurá che gnará ai 5.12 a saludé düc i mituns. A La Ila passará San Micurá ai 6 de dezëmber a ti porté na picera scincunda a düc i mituns dales 17:00 pro le parch dan la scora dai schi. A Corvara gnarál indô metü a jí le marcé da Nadé cun deplö partezipanc che dá fora val’da bëre y da mangé sciöche ince produc locai y d’artejanat. Le marcé gnará metü a jí dai 8-10.12 y dai 15-17.12 y sura Nadé dai 22.12 ai 07.01 tres dales 16:00 ales 19:00. Te deplö ocajiuns gnarál metü a jí intrategnimënt musical y apuntamënc speziai, anter chisc ince la defilada di angeli preodüda ai 9.12.


»Tëmp da Nadé te museum«
Le Museum Ladin Ciastel de Tor deura sües portes por le »Tëmp da Nadé te museum«
Le Museum Ladin Ciastel de Tor pó gní vijité cun entrada debann. Al vëgn pité da bëre y da mangé. Chiló deplü söles manifestaziuns.
La sabeda, 2 de dezëmber, dales 17:00 ales 19:00, sona scolares y scolars dla Scora de musiga Val Badia melodies renascimentales y baroches ti salamënc dl Museum Ladin Ciastel de Tor. Por mituns y mitans vëgnel proponü n laboratore creatif.
La sabeda, 9 de dezëmber, dales 17:00 ales 19:00, pita le trio de archëc »Camava« na cornisc musicala tla stüa dl Museum Ladin Ciastel de Tor.
La jöbia, 14.12, dales 15:00 ales 17:00, pita le Museum Ladin Ursus ladinicus (San Ciascian) vijites menades fora por museum y laboratori creatifs por mituns y mitans. L’entrada vëgn pitada al prisc de 5,00€, al vëgn dé fora da bëre y da mangé.


Conzert dl Cor Kerygma
»Tëmp por dí giulan« é le titul dl conzert ai 3 de dezëmber, olache an saludará ince la dirighënta Agnes Irsara
En domënia ai 3 de dezëmber dales 17:00 él te dlijia de Badia n conzert cun le cor »Kerygma«, sot al titul »Tëmp por dí giulan«. Te chësta ocajiun saludará le cor ince süa dirighënta Agnes Irsara, che dá jö la bachëta do tröc agn passá deboriada. Dlungia le cor, sonará ince i »Turmbläser« de Badia, sot la direziun de Fridl Pescoller.