La Usc di Ladins

L é passà 130 egn da canche, de firé del 1896, nascea la Coprativa a Sèn Jan. N event che à segnà la storia de Fascia e che l Fassa Coop chest an l à volù uzar fora con desvalive scomenzadive, ence te la radunanza anuala.

En sabeda ai 28 de firé te palestra de le scole mesane, dedant a 470 sozi, l president Norbert Bernard à rejonà de na azienda che cogn ge star do ai aspec economics e vardar ai projec per l davegnir, ma zenza desmentiar i valores che l'à fata nascer, speran de ge la lasciar amò miora a chi che vegnarà do.
La Coprativa era nasciuda per responer al besegn de na comunanza pureta, l à dit, noi cognon vardar de capir che besegnes che l é aldidanché.  
Chela metuda su enlouta no l era bele na boteiga ma n projet sozial, n model de solidarietà te egn che bastaa che l temp no deide e l era fam vera. Per rejonar de chest l é stat chiamà n joen fiamac che à studià al Liceo te Fascia: Giacomo Panozzo, divulgator storich da 330.000 follower, ge à portà dant ai sozi n feruscol excursus storich dal scomenz del 1800 che à fat entener che che volea dir esser comunanza solidala, far cooperazion e tegnir adum, conzec che anchecondì col individualism se risia de perder e che l é emportant no desmentiar, no per idealisar l passà ma per tor consaputa che per la pruma outa nosc esser comunanza l é do a se desfantar, l à serà su anter l batiman.

Apede a le bone intenzion, speran de poder le concretisar, na azienda cogn vardar ence ai numer: l bilanz é stat prejentà da la diretora aministrativa Mirna Depaul

Podede lejer dut su La Usc dai 6 de mèrz da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)