La Usc di Ladins

Sciöche nos la conesciun é l’audanza »Bunes Festes« na manira sinziera de ti aodé a familiars, amisc y colegs n bel tëmp de festa incër le Nadé – n tëmp lié ala serenité, ala ligrëza y ala pesc. Chësta audanza pó tó ince d’atres sfomadöres, sciöche chëra dl umor fosch, por ejëmpl canche ara devënta le titul de n toch teatral che cunta de döt ater co na storia ligra da Nadé. 
»Bunes Festes« é le titul chirí fora dal regist Matteo Rubatscher, che á traslaté dal inglesc tl ladin le toch »The Lying Kind« de Anthony Neilson. Le teater porté sön palch dai mëmbri dl’Uniun Teater da San Martin se presentëia sön le jorantin sciöche n »teater da rí«, cun na storia caraterisada da componëntes che röia en contrast: en Vëia de Nadé mëss dui polizisć ti porté na noela tragica a na mëda y a n berba. Chësta é la situaziun che se presentëia canche la cultrina se deura.

Ara ne döra nia dî che le toch lascia gní a löm süa sostanza: na storia da Nadé sot forma de na farsa foscia. Le toch atoca tematiches sensibles sciöche la demënza y la sessualité, y tichinëia la morala cun la rapresentaziun de figöres ambivalëntes y ries da desmascheré. 
En sabeda ai 14 y en domënia ai 15 de novëmber él da odëi les ultimes rapresentaziuns tl salf dles manifestaziuns a San Martin de Tor.


Deplü da lí ciafëise tla ediziun nöia de vëndres ai 13 de novëmber!