La Usc di Ladins

Sta ota i s’à betù danoo a lourà aduna, intrà ra Filodramatica d’Anpezo e ra asociazion Repeat, par fei un bel teatro, da mostrà a ra parsones del paes, ades che son de outon, canche ra śente r’à pi tenpo, r’é manco ciapada dal laoro, da ra stajon.
Intrà crodes de ra pi veces, lejendes de paes e anbizios modernes, ra Dolomites ‘s é inze meśo, intrà el pasà e ancuoi.
Ra prima de chesto noo teatro “Le Dolomiti non esistono – e se Dolomieu s’aese falà” sarà sabeda ai 14 de noenbre che vien, da dasera dares 20.30, a ‘l Alexander Girardi Hall. A ‘l scrie ‘l é stà Martino Apollonio Varentin, che ‘l é anche rejista e ator; ‘l é stà voltà par anpezan da Anne e Flora Menardi Diornista e da Luciana Pradetto. Duto scomenza del 1789, canche Deodat de Dolomieu el varda chesta nostra crodes con oce noe, con na natura coscita bela, destinada a i dà un gnon conosciù par duto el mondo. Del 1962, dapò de deboto dojento ane, chel medemo valor el podarae mudà del duto, canche i rua ca con chera de cabolà, robà, fei speculazios, su par sta crodes, inze sta vales, a bartaśà chesta comunità. Dute on ra nostra Dolomites, cheres che me sà pi beles, cheres che on inze el cuore, da canche son pize, inze ra nostra vita de ancuoi.

De plu tla edizion stampeda de La Usc di Ladins o sun l e-paper a paiament www.lausc.it/e-paper