"Plan de Corones" ladin

Data

17 de november 2026

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publicaziun dal comunicat stampa dla sontada dal Comité de direziun de Kronplatz Brand encö.
Plan de Corones: düc a öna por fá en vare ennant tla cuestiun dal ennom

Le comité diretif fej fora da laoré deboriada por reinserí l’ennom „Plan de Corones“ tla merscia turistica


17 de november 2026 – Do encuntades y confrunc entensifs sön la cuestiun dal ennom, loada sö tal cader dal orientamont nö dla merscia Kronplatz/Plan de Corones, á le comité diretif arjunt al'unanimité na acordanza sön i proscimi vari da fá. L'obietif é chël da ciafé na soluziun deboriada co dái la poscibilité da porté endô ete l’ennom „Plan de Corones“ tla merscia, zonza dé sö i obietifs originai dal proiet de posizionamont nö.

Tles ultimes edemes á l’orientamont nö sciüré sö de gran discusciuns. En pröm vare emportant por na miú comprenjiun reziproca él gnü fat tla encuntada dai 4 de novëmber 2026 con raprejentanc dai Scizeri, dla comunité ladina, le diretur dla Formaziun y Cultura ladina André Comploi y raprejentanc de Plan de Corones/Kronplatz. Desco empormotü te cösta ocajiun, á Kronplatz Brand prejenté les aspetatives gnüdes fora dan al comité diretif, l'organ competont por les dezijiuns tla materia.

Le comité diretif á tut al'unanimité la dezijiun da enciarié l'agenzia co s’á dé jö con le svilup dla merscia. Deboriada dessel gní elaboré propostes concretes de coche l’ennom „Plan de Corones“ pó endô ciafé visibilité tla publicaziun dla merscia. Les propostes dess tó en conscideraziun les posiziuns desvalies y cherié la basa por na soluziun deboriada.

"I oress rengrazié les Ladines y i Ladins co á lascé aldí söa usc te cösta cuestiun y ti fá i complimonc ai mëmbri dal consëi diretif co á tut la dezijiun al'unanimité. Fora de na crisa él gnü cherié na oportunité olache düc vën plü stersc. An á podü odëi tan emportantes che comprenjiun y sensibilité por i lingac de mendranza y por les identités culturales é. Plurilinguism y diversité culturala n'é nia en impedimont, mo en valur emplü – tan deplü tal ciamp dal turism, olache la sostenibilité ciafa entres plü emportanza. Che cösta pluralité dess ciafé ince endô visibilité tal logo é en sëgno emportant. Ensciö pó le cajo 'Plan de Corones' ester da ejompl positif ince a livel internazional", ensciö André Comploi, diretur dla Formaziun y Cultura ladina dla Provinzia autonoma de Balsan.


Na dezijiun al'unanimité do en confrunt sot

"Al é sté debatimonc soc y nia entres saurisc, deache ala fin nen vára da tó en conscideraziun i enteresc de dötes les perts. Avisa por cösc, mo féjel plajëi che da ester roés a en ce da ciafé deboriada na strada costrutiva por jí ennant y da tó na dezijiun al'unanimité“, spiega Daniela Gasser, presidënta de Kronplatz Brand.

"Ara ne se trata nia d’en resultat tan sciompl. Cösta dezijiun mostra ince le valur de nosta colaboraziun: tla Kronplatz Brand s’á motü adöm les cinch uniuns turistiches y le Skirama con l'obietif da promere deboriada döt le raiun. Le fat che an é roés adöm te na posiziun deboriada, confermëia la solidité de cösta colaboraziun. Al á orü ester la bona orenté da se ascuté sö önn con l'atra y da jí adancuntra.“

En grup de laur comunn acompagnëia i proscimi vari

I azënc por na soluziun poscibla gnará laorés fora y valütés deboriada con l'agenzia enciariada, tal cader d’en grup de laur motü sö danö. Les propostes co gnará a löm i gnará prejentades al comité de direziun por la consulënza y l’aproaziun.

Tal grup de laur se ativará raprejentanc dal Comun de Mareo en raprejentanza dla popolaziun, raprejentanc dal setur turistich local y raprejentanc de Kronplatz Brand.

L'entenziun é chëra da i garantí na lerch y prejënza ales aspetatives dla popolaziun y dai operadus turistics locai desco ince ai enteresc de döt le raiun turistich de Plan de Corones. 

Ince Katrin Ellecosta, assessuria ala Cultura dal Comun de Mareo, y Michael Ploner, comandant dla Compagnia dai Scizeri d’La Pli de Mareo, é encontonc dla strada tuta sën deboriada:

„I salüdun con gran ligrëza la dezijiun al'unanimité dal comité de direziun y la desponibilité de dötes les perts enteressades da laoré deboriada por na soluziun. A nos se stêl dandadöt a cör da endespré y renforzé la coscionza tla popolaziun y da reconësce deboriada le valur de nostes raisc y de nosta identité. Le grup de laur comunn é sën na bona basa por laoré fora propostes concretes. Al nes fej plajëi che le dialogh vëgni porté ennant a na maniera costrutiva y i sun confidonc che an pó roé a na soluziun deboriada, co vën ince portada da dötes les perts enteressades.“

Le grup de laur restará atif ince sora la cuestiun dal ennom tal logo fora. Te na secunda fasa se dedicará le grup de laur a na maiú sensibilité y comunicaziun dal lingaz ladin y dla cultura ladina te döt le raiun turistich.

Iaco Rigo