En mercol ai 18 de november da sera se à destudà don Erminio Vanzetta. Don Erminio l é nasciù forin Juan ai 29 de mèrz del 1933 e l é stat ordenà preve a Trent ai 22 de mèrz del 1958. Dal 1962 al 1967 l é stat coadiutor a Sèn Jan e do aer ret la parochies de Bondon e Baitoni l é stat per n muie de egn vin Primier. Del 2004 l é ruà endò a Sèn Jan e l à ret la parochia de Vich e dapò ence chela de Soraga fin del 2014 canche l é ruà don Andrea Malfatti e el restà colaborador. Del 2023 la parochies ge aea fat festa per si 90 egn e per si 65 egn da preve. Te chest ultim temp la forzes é jites a mencèr semper de più fin canche ai 28 de aost de chest an l é jit a stèr te Cèsa de Paussa. Sia sor Margherita la ge é semper stata apede con dedizion e afet.
L era n om da mont, l era stat tel Socors vin Primier olache l era adertura la stazion e i mesi te calonia e ence te Fascia l jia semper do vièi e a crepes. Sa mont l é chiet e acort e se é più vejins al Segnoredio, l dieja. Ades l sarà segur te sia Pèsc.
La sepoltura, col Piscop Tisi, é doman, vender ai 20 de november da les 14:30 forin Juan. Insnet, jebia ai 19 de november, vegn dit su la corona da les 20:00 te Pieif de Sèn Jan. Develpai de dut don Erminio.
(MCI)
Ne à lascià don Erminio Vanzetta
L se à destudà en mercol ai 18 de november. La sepoltura doman te gejia de Juan.
Galaria retrac
View the embedded image gallery online at:
https://www.lausc.it/valedes-ladines/fascia/32961-ne-a-lascia-don-erminio-vanzetta#sigProId6af9420cfa
https://www.lausc.it/valedes-ladines/fascia/32961-ne-a-lascia-don-erminio-vanzetta#sigProId6af9420cfa




