La Usc di Ladins

Chel che se à da pech serà sù l’é stat n an de scola desvalif dai etres e, per vèlch vers, ence senester. Se à cognù fèr i conts co la neva regoles per la segureza sanitèra, se à cognù se usèr ai couribocia e no se à podù trop se mever.

I bec dant da duc i é stac forc e valenc, i à sapù se adatèr e jir inant con si eies lumenousc e sia cèria de energia. Speron che soraldut per ic l davegnir l sie mior.

Te la ùltima setemènes de Scola mìngol te duta Fascia se à metù a jir dalbon de bie projec.

La Comiscion mobilità de la Scola Ladina via per l’an la ge à dat l met ai bec de la quarta populères de Fascia de fèr la raida virtuèla del Trentin con »Kids go green« na piataforma online olache i bec segnèa ite ogne dì con che meso che i ruèa te scola e su la basa de chest se binèa ponts per jir inant coi chilometres virtuèi. A la fin del projet te la setemèna de la »Scola zenza prossach« se à endrezà l ‘bicibus’ e con maestres e genitores i bec i é jic e vegnui da scola duc i dis con la roda, chi più forc i é ponté demez da Ciampestrin e da Penia envers Cianacei.

Semper te la setemèna dedichèda ai laboratories se é jic sun Dos di Pigui a enrescir noscia storia veia e veiora, se à fat vegnir i esperc (giaves e pères) de la eves, se é jic a veder coche nasc i ponjins e amò se é rué al My Kosher Hotel de Dèlba per veder la Sinagoga.

Te duta la quartes de la Scola populères de Fascia se à ence metù en esser n Lapbook spezièl e de calità su la Dolomites Patrimonie Unesco.

L’é stat dalbon bel poder endò pissèr a la scola desche usc sul mond e en contat con l teritorie e con la comunanza.

Ge auguron a duc i bec de Fascia e de duta la valèdes ladines n bon istà a l’averta e pien de marevees.  (La maestres de la scola de Cianacei)