La Usc di Ladins

L é passà 10 egn da canche, ai 13 de mèrz del 2013, do che per 4 outes dal ciamin de la Cappella Sistina se aea levà l fum neigher, l é ruà la terza fumèda biencia e l fatidich »Habemus Papam« à fat crepèr fora la legreza de duta la jent che spetèa te Piaza Sèn Piere. L era les 7 da sera e i 115 cardinai del Conclave aea lità l 266° papa.

Canche pech più che n’ora do Jorge Mario Bergoglio é ruà fora sul barcon de la Basilica se à vedù sobito che l era n papa fora de anter: l à saludà la jent con n »bonasera« e l à dit che i cardinai cognea ge dèr n vescof a Roma e i é jic a l tor »beleche a la fin del mond«. L se à prejentà regolà de bianch, a na vida scempia. L era l prum papa che vegnia da l’America Latina, l prum gesuit e l prum de la storia che à cernù l inom de Francesch.

Sia pruma paroles à dit sie entendiment de scomenzèr n percors de la Gejia de Roma fat da vescof e popol adum, n percors de fradaa, de amor, de fiduzia che tole ite dut l mond e che l sie percacent per l’evangelisazion. L inom cernù e la dezijion de renunzièr a la rica mondura tradizionèla à palesà sia voa de portèr la Gejia a esser più vejina a la jent, ai purec, ai umoi, a duc i ‘ultimes’ de la tera. Strèda confermèda da sia volontà de jir a stèr te la cèsa Santa Marta enveze che tel gran e storich cartier tel Palaz Apostolich.

Dut chest à fin da sobito soscedà reazions desferentes: per tropes legreza e gaissa, per etres desfidenza e na contraposizion che te vèlch cajo l é doventà adertura odie, didà dal manicheism che cresc pascentà da mass media e social.

Te chisc 10 egn Papa Francesch à semper metù dantfora la ‘bona noela’ del Vangele de Gejù te sie segnificat più concret e manco formal, chel del amor per dut l ‘popol de Die’, che vel dir umanità, fraternità, chierir de capir e perdonèr enveze che giudichèr e condanèr, tem de sia enciclica »Fratelli tutti«.

De più su La Usc stampèda de vender ai 17 de mèrz.  (Lucia Gross)