La Usc di Ladins

Ai 11 de setëmber, dala 14:15 iesen julei sun Dantersasc, ulache n ël ova udù na persona dajan sëura cun l parapënd y minova che chësta se ëssa fat mel. Ruvei sun luegia àn riesc udù che l ne se ova fat nia, nsci l àn lascià ulache l fova.

Ai 12 de setëmber iel stat n ntervënt ntëur la 15:00 dlongia Col Raiser, per n’ëila cun na crisa de panich. N ti à dat zeche per la chieté ju y ie pona julei limpea tl spedel de Persenon, da ulache n ie unii cherdei sun la furcela dla Cir: n ël de 48 ani fova tumà sun n troi y se ova rot l pols cianch. Cun na binda curta l àn trat su tl joler y l à menà tl spedel de Persenon. De reviers a Puntives à n’ambulanza menà adalerch n ël tudësch che n fova jic a tò sun la Mont de Sëuc: l ova mel al piet y l cuer che batova dassënn. L dutor l à vijità y l à pudù furné inant cun l’ambulanza tl spedel de Persenon. Plu tert à l Aiut Alpin Dolomites messù julé a Burnech per n trasferimënt de n pazient ntubà, ma pervia dl bur’ tëmp àn messù dé sëura tla sënta a Puntives ajache l ne fova nia mesun julé. L pazient ie pona unì menà te spedel de Bulsan cun la Crëusc Cuecena, deberieda al dutor dl Aiut Alpin.

Deplu te la edizion dl vender, 22 de setember.