La Usc di Ladins

Ai 3 de utober iel stat cater ntervënc per l Aiut Alpin, un de chisc tla valedes ladines: sun Jëuf de Sela sot ala prima tor dl Sela se à n ël stort na ciavidla dajan sëura cun l para­pënd. Do la prima cures contra l mel iesen julei limpea tl spedel de Persenon.
Ai 4 de utober iel stat doi ntervënc da fé per l Aiut Alpin Dolomites, l prim ora dla Ladinia. L segondo ntervënt ie stat dala 23:00 te Sëlva, plu avisa te Val, per jì a crì n seniëur tudësch che fova muet da la utia de Puez y ne fova nia ruvà ju te Val. L joler à fat n jol bas tres duta val ite per cialé de abiné l ël, ma per gaujes de bur’ tëmp àn messù ti la zeder y à pudù jì inant cun la crissa permò l di do.
Ai 5 de utober àn cris inant l ël tudësch te Val: i judacrëp, deberieda ai Destudafuech y ai uemes dla Finanza, ova bele scumencià abenëura. Sëuraprò iel nce mo unì cherdà l Pelikan 1, che fova de servisc daduman. Purtruep àn abinà l corp zënza vita dl ël, che fova tumà y berdulà ju n 80 metri sot al troi che porta dala utia de Puez de viers de Culea de Val. N chël di iel pona mo stat doi emergënzes saniteres, una a Sëuc y una a Steinach te Ahrntal.

De plu tla edizion stampeda de La Usc di Ladins o sun l e-paper a paiament www.lausc.it/e-paper