La Usc di Ladins

Prejëntete, prëibel.

Son Samuel Walpoth, é 27 ani y son de Urtijëi. Son l mut de Bruno Walpoth y Rita Dorigo y l fra de Alex y de Tobia.

Ce percurs es’a tu fat y ciun ie pa ti lëur?

È fat la scola auta de ndustria (Gewerbeoberschule, ndr.) a Bulsan. Daldò éi fat l bachelor de eletrotecnica a Dispruch. Ntan l covid éi scumencià a lauré pra la Cruësc Blancia y é pona tëut la dezijion de studië nfermieristica. Muesse mé plu fé la defensio, fine de setëmber. Ulësse mo fé na istruzion sëuraprò per lauré tla stazion ntensiva.

Ce lëur uloves’a fé da pitl–fòvel pa for chësc?

Ma ses’a che ne sé nianca. L me à for bele sapù nteressant l ciamp dla tecnica y di conc. Perdrët me ëssi mpensà che jiré nce inant te chël ciamp. Da pitl me savòvel nce nteressanc i joleri.

La prufescion che ulësse fé ie nfermier tl joler, chël fossa l mascim. Zeche me toma bën mo ite: canche fove plu jëunn ti cialovi bën cun plajëi ai libri de medejina de mi fra; iló se à pa bën nce svilupà l nteres tla medejina.