La Usc di Ladins

Semper più de spes se sent rejonèr de bulism e de cyberbulism e no l é n problem che revèrda demò la gran zitèdes, ma ence nesc paijes. L sorastant Federico Corradini l à na gran atenzion per chest argoment, e te la Scola ladina de Fascia l é na Comiscion per la sensibilisazion contra l bulism, che à desche referenta la dozenta Alice Vinante. Aon rejonà con ela, che l é ence la responsabola de n projet che rua a compiment chesta fin de setemèna e che tol ite duc i livie de scola, per rejonèr de bulism a na vida lijiera ma fona e uzèr fora l valor de la paroles.
La prof.ra Vinante ne à contà di protocoi per l bulism te la Scola Ladina de Fascia e del projet che à portà a la realisazion de chesta raprejentazion con la esperta de teater Michela Marangoni.
L spetacol 'C'era una volta un bullo', compagnà da na mostra fotografica de Davide Baldrati, vegn portà sun paladina doi outes: insnet vender ai 15 de mé da les 20:30 te chino de Cianacei e doman sabeda ai 16 da la medema ora te Navalge a Moena.

Podede lejer dut su La Usc dai 15 de mé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)