La Usc di Ladins

Un di gragn protagonisć dl ciamp scolastich, cultural y sozial ladin nes á lascé. En lönesc ai 29 de jügn da sëra ciafâi la noela che al ê mort Franz Vittur de Badia y bele atira me gnôl le pinsier co che an ess podü recordé na porsona o na personalité che á lascé te nosc pice monn ladin na merscia tan sota. Y chiló ne mini zënzater nia "ma" la merscia profescionala, linguistica, culturala o soziala, mo bëgn ince chëra umana. Al é chëra che m’á dagnora fat pro d’ël na certa impresciun. Da dí la verité ne n’ái nia albü n gröm de ocajiuns da m’la cunté impara, mo de chi iadi che i á podü l’odëi o baié de porsona – canche al storjô ciamó pro te redaziun, canche al tignî n referat o canche al presentâ na publicaziun – me recordi dantadöt süa manira de ester. Na porsona scëmpla, n lingaz dagnora respetus, che gnô dal cör, n carater cun convinziuns frëmes, y döt adöm na usc dër sapiënta, da chëra che an podô dagnora imparé val’ por le laur y dantadöt por la vita. Chëra de Franz Vittur é stada na vita plëna, che an recordará dantadöt ince por i 47 agn al sorvisc dla scora ladina, impröma sciöche maester, spo diretur y sciöche pröm intendënt ales scores ladines de Südtirol. 

T’La Usc di Ladins di 3 de messé recordarunse deplü fora dla vita de Franz Vittur y i ciafarëis ince n recort personal dl presidënt dla Generela Roland Verra.
Ala fomena Agnes y ai mituns Gabriella, Verena, Daniela y Claus, i vál les condolianzes plü sintides.  (pablo)