La Usc di Ladins

Co él possibol tegnir en equilibrie n cheil sul nès? Per coluna rejon él più sorì jièr l diablo canche l śira? Do coluna traietories sgolei i èrc del jogolier? A chesta e n muion de autra domanes se pel aer responeta anter i desć de Jocalo, la mostra scientifica de fisica e jogoleria averta da pec dis te scola populèra de Vich. 
L rich percors espojitif, pien de curiositèdes, colores e postazions multimedièles, l é stat avert al publich te la inaudazion ofizièla en jebia ai 9 de messèl ti spazies de la scola de Vich, con de bie aprijiamenc da man de la autoritèdes, con cunsć artistics da man di jogolieres de Circensema e con doi performance de teater scientifich endrezèdes da man di CircenJogolieres Daniele Chiocchetti, student de fisica a l’Università de Trent, e Thomas Zulian, dozent de fisica ti licees de Fascia. 
L nef alestiment de Jocalo te la aules de la populères de Vich l ge va do chel pissà fora per l an de scola dai studenc de la clas 3LSA del liceo scientifich de la Scola Ladina de Fascia en colaborazion co la 4D del liceo U. Dini de Pisa, col coordenament di dozenc fascegn Luca Riz e Thomas Zulian e de la professora Sabina Sarti da Pisa. Bel didament a la realisazion de la postazions de la mostra l é stat dat ence dai jogolieres fascegn de Circensema, che se à cruzià soraldut de la produzion de bie video che moscia movimenc e cunsć descric tel percors scientifich e de meter a la leta èrc e jeghes per fèr damat.
La mostra Jocalo la restarà averta duc i dis, fora che la sabeda, enscin ai 21 de aost con oraries da les 3 a les 7 domesdì e demò de lunesc e de mercol ence da les 8 a les 10 da sera. La vijita al percors la vegnarà semper vidèda dai joegn de Inout, pascioné de comunicazion de la scienzes, e la é pissèda per duc, gregn e picoi. Jocalo, très la marevees del circo, la ge dèsc l met a duc de entener mingol miec la leges de la fisica che fèsc jir l univers e che mef duta noscia giornèdes: na ocajion da no perder! Più info sul sit www.inoutfassa.com/jocalo o al numer 3272849619.

Podede lejer dut su La Usc stampèda dai 17 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (TZ)