La Usc di Ladins

En sabeda ai 11 de jené na giornèda de gran soreie e, soraldut, de gran sport chela che à vedù se dejoujer la 44^ edizion de la Pustertaler Ski-Marathon. Da Sesto Pusteria, olache l'é stat l start, a Villabassa per l percors classich o Prato Piazza per chi che à cernù l nef percors de 42 chilometres “Adrenalin”, oviamenter con la pouses te sot ai schi.

Anter i partezipanc ence l'òr olimpich Sochi 2014 Aleksandr Legkov. L'é stat apontin l'atlet rus a se vadagnèr la venta de la garejèda Classic longia 62 chilometres con travert a Villabassa. Na venta al fotofinish per Legkov (2h29'41”), ruà a la fin de la proa con n soul second de vantac sul secondo atlet logà, l patron de cèsa Manuel Amhof (2h29'43”). Amò a soi 5 seconc de destach à serà l podie di omegn l trentin Simone Varesco (2h29'47”).

Manco descombatuda la garejèda de la eles, con na vitoria sorida per Sara Pellegrini (2h50'05”), venjidora con adertura beleche 6 menuc e mez de vantac su la seconda femena en classifica, la todescia Franziska Müller (2h56'34”) che aea vent l'edizion 2018. Terza enveze l'austriaca Petra Tanner (3h10'50”) ruèda a Villabassa con n entardivament de passa 20 menuc.

Sul percors “Adrenalin” de 42 chilometres enveze l'é ruà l suzess anter i omegn per Simone Daprà (2h24'08”) del G.S. Fiamme Oro Moena, che se à vadagnà l prum sciaier del podie. Podie serà sù da Dietmar Nöckler (2h25'16”), ence el tel G.S. Fiamme Oro Moena, al secondo post e Paolo Ventura (2h27'09”) al terzo. Te la corsa resa medaa de òr per la todescia Jessica Dotzler (3h09'03”), con la Tèlia enveze a se vadagnèr arjent e bron de gra a la proes de Paola Leonardi (4h17'08”) e Nicole Gschnell (5h00'07”).

La garejèda ladina

La 44^ Pustertaler Ski-Marathon di 11 de jené 2020 l'à abù ence na bela partezipazion de ladins, anter chisc Adele Pollam che à volù ne contèr en curt sia esperienza: “É dezidù de tor part a chesta garejada per 2 rejon: desche arcedament per la proscima Marcialongia, ma soraldut perché é tout part n muie de oute con mie cariscim om Dino e canche son su chi portoes me par semper de l’aer dintorn. L nef percors l'aea valch erta de sot en su più che zenza, soraldut per ruar fin sunsom a la Val Fonda, ma con vedude beliscime: le Dolomites de Sesto, l lach de Landro, le trei Cime de Lavaredo, l Cristallo e la Croda Rossa... n encant!”.

Adele Pollam à serà sù sia proa con l temp de 5h32'25” al 24° post assolut anter la eles tel percors Classic e 5^ de sia categorìa. Ma rejonan de piazes fascènes, l'é ruà semper tel Classic l 17° post de Serena Pellegrin de la 3Esse Soraga (4h40'33”).

Te la 62 chilometres di omegn troon Flavio Pellegrin al 42° post col temp de 3h05'.44” e dapò Diego Deflorian (3h08'.37”), Erwin Riz (3h09'.22”), Markus Daprà (3h11'01”), Luciano Dalle Mulle (3h11'47”), Mauro De Biasio (3h15'.22”), Romano Pellegrin (3h24'59”), Elio Decrestina (3h40'25”) e Paolo Pellegrin (4h40'33”).Te la 42 chilometres al 16° post Renzo Dezulian (3h22'31”) e dapò i ampezegn Willi Alverà (3h26'53”) e Giovanni Menardi (4h08'01”).


 (Daniele Verra)