Brignone tla storia, Fischnaller la scri inant!

Data

14 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Desdites les gares dla finala de Copa dl Monn de schi alpin FIS te Ampëz, davagna Federica Brignone la Copa dl Monn generala dles ëres. Y Roland Fischnaller, un di "old stars" dla Brëia dla Talia concuistëia la gran Copa dl Monn de paralel y la picia Copa dl Monn tla disciplina de slalom lerch paralel. Y inier á la Talia ciamó registré na gran devënta che fej plajëi te chësta sajun turbolënta danter pücia nëi y epidemia coronavirus: Michela Moioli á davagné söa terza Copa dl Monn tl snowboard cross y s’avijinëia cun sëgn 13 suzesc tla classifica dles devëntes talianes dla brëia al record de Marion Posch da Calfosch che n’en tin indöt 16
La Talia ne la dá nia sö, gnanca ti tëmps plü crödi. I viun le tëmp dl coronavirus y desco düc i seturs á ince le Sport messü s’un sintí chëstes edemes y dantadöt chisc ultims dis di efec negatifs y dles desdites. Porchël é te chësc momënt gran pert dles sajuns de copa dl monn de sporc invernai stlütes jö.
Te val’ caji n’ál gnanca podü gní tigní la zerimonia y festa ofiziala por la premiaziun finala che ti surandá ai mius atlec dla sajun les copes y les medaies.

La gran Federica Brignone

Federica Brignone á scrit n capitul nü tla storia dla loína rosa ("valanga rosa", sciöche la scuadra feminila dla Talia vëgn tlamada). Ara á davagné desco pröma atleta taliana la gran Copa dl Monn, te na sajun danter i alc y basc de gares sburlades y desdites, y na Mikaela Shiffrin atocada dal dolur por la mort de so pere.
Federica Brignone á ala fin coiü adöm bëgn 1378 punc, dan a Mikaela Shiffrin cun 1225 y Petra Vlhová cun 1189. Dlungia ala gran Copa dl Monn se porta la Brignone a ciasa ince la picia Copa de Gigant y la picia Copa dla Combinada. Lapró resultëiera secunda tla tlassifica finala dl superG y terza tles tlassifiches fianles de discesa y paralel. Chapeau!

Le gran Roland Fischnaller

Le südtirolesc Roland Fischnaller é un di manco jogn pro les gares de Copa dl Monn. Impó él tres ciamó dancá, dantadöt tl paralel, olache al á davagné en chësc ann la Copa generala che tol ite "paralel slalom lerch" y "paralel slalom", y lapró ciamó la picia Copa dla disciplina de paralel slalom lerch.
Roland Fischnaller, nasciü de setëmber dl 1980, á n bel palmarès da mostré sö:
- al á tut pert bëgn a 5 ediziuns de Olimpiades invernales cun 6 starts
- al á tut pert a bëgn 10 Mondiai da indöt 18 gares, arjunjon 5 medaies, de chëstes 1 d’or
- al á tut pert a 214 gares de Copa dl Monn, rovan 41 iadi söl podium y davagnan 18 iadi.

Te chësta sajun, dan püc dis, él gnü lapró la gran Copa dl Monn dl "paralel". Ara arichësc söa coleziun fata dala Copa dl Monn generala dl ann 2012, la picia Copa dl Monn de slalom lerch paralel de chësta sajun y les trëi pices Copes de slalom paralel por les sajuns 2013, 2016 y 2018. Le Sport ne vëgn mai vedl – dijon, y sëgn pón ajunté: i Atlec ne vëgn mai vedli!





 (Iaco Rigo)