La Usc di Ladins

Chest’outa aon pissà de intervistèr Caterina Ganz, autra atleta fascèna de gran nonzech. La joena moenata l'é na campiona del paslonch, disciplina che l'à veduda ruèr a livìe auc n muie en prescia, per na cariera che se disc maraveousa. L'atleta clasc '95 la se à contà te na bela intervista che ve lascion te chesta piata, olache l'à prejentà sia vita tant tel sport che fora: »N bel salut a duc, son Caterina Ganz, è 24 egn e son da Moena. È na gran familia, fata da mio pare Carlo, mia mare Margherita, mio fradel Michele e trei sorele Martina, Benedetta e Chiara. Me piasc n mulge i doices, far shopping, jir al mar e nodar, lejer e ciantar. Fae paslonch de profescion e fae part del grop sportif de le Fiamme Gialle de Pardac«.

La Usc: Enceben che te sies n muie joena, t'ès jà n bon pec de egn de esperienza tel mond del paslonch. Podone dir che l 2015 l'é stat l'an del scomenz?

Caterina Ganz: Me à semper saù bel far sport, son semper stata portada e me à semper piajù la competizion. Canche ere picola, zirca a l'età de 5 egn, è scomenzà a corer te l'Union Sportiva Monti Pallidi de Moena e l'è fat per 10 egn più o manco, canche de 15 egn è dezidù de passar al paslonch e pontar via col ski college de Poza. Alò è podù jir a la scola d'art e endana prategar i schi. Son passada dant tel Comitat trentin, dapodò te la squadra nazionala juniores. Del 2015 jir coi schi l'è deventà mio laoro e son jita ite te la Guardia de Finanza.

Se no fale, t'èes demò 21 egn canche t'ès coret per la pruma outa en Copa del Mond, te recordeste coche l'é stat?
Mia prima garejada en Copa del Mond la é stata de jenè del 2017 a Ulricehamn te la Svezia. L'é stat dalbon bel, l'era 40 mile persone entorn la pista a ne sostegnir e me recorde che è vivù dut cant con gran legreza. L secondo dì de garejade aeve tot part ence a la stafeta de ele ensema a mie compagne de la nazionala. Valch setemana più tart è partezipà per la prima oita ai Campionac Mondiai de Lathi te la Finlandia: no me desmentierè mai de chele garejade, l'era la prima oita per me te n mondial assolut, me recorde dut con gran afet. Anter l'auter aeve arjont ence de bie resultac, donca no pode che aer de bie recorc.

Tel spezifich, l paslonch à desvaliva spezialitèdes. Colune coreste tu e coluna él chela che te preferesces?
L paslonch l'à doi spezialità: la tecnica classica e l skating, con distanze longe o gare sprint. Mia disciplina preferida l'é la tecnica classica, en merit a la distanza dijesse i 10 km. Cogne dir aboncont che ti ultimes egn è lurà n mulge, e amò l fae, per esser competitiva te duc i format.

Duta l'intervista é da poder lejer su La usc stampèda de vender ai 24 de oril 2020.

 (Daniele Verra)