La Usc di Ladins

L'à de gregn obietives l Ski & Ice College, projet de la Scola Ladina, nasciù del 2002, patrozinà da la FISI Trentin e ret da la sorastanta Mirella Florian.
A ne les contèr l'é stat un di arcedadores, Roberto Pasero. »Tel staff sion 3 arcedadores atletics, con Davide Verga e Silvia Uberti – l ne à dit - gé ge vèrde dò a n grop de schi alpin, al grop de brea, al freestyle e al hockey. Tacon via con la preparazion de mé e finion de mèrz de l'an dò«.

Dedicà ai bec di licees scientifich, linguistich e artistich per i bec che fèsc schi alpin, nordich, biathlon, sauc, freestyle e snowboard, e da vèlch an ence hockey e bal sui feres, l projet l ponta chest an an n travert da no creer, chel di 100 atlec enscinué en vista de la proscima sajon. Atlec che sessaben ence te chisc meisc i à podù seghitèr col sport de gra al lurier online portà inant col staff.

»L'é n bel projet perché i bec i pel se arcedèr ence dadoman – ne à dit amò Roberto - n'outa ogne doi setemènes via per l'an scolastich se troaane la pruma ora a fèr preparazion ajache de lunesc domarena no l'é l'arcedament su la neif. Chest se à podù l fèr ence de gra al responsabol de la scola Stefano Ellecosta che l me à dat l met de portèr inant chesta idea. Ence gé é fat l Ski College e l me a didà n muie per meter ensema studie e sport, perché se sàa che l sport a livel agonistich l domana n mue de temp per ruèr al mascim di resultac«

Chest an l virus à metù sotessora l mond del sport e dèr n bilanz segur di resultac otegnui l'é senester, ma l'atività agonistica del projet é jita delvers e i numeres per l'an che vegn i é amò maores: per l'an 2020/2021 l’é na trentina de domanes per l schi alpin de bec enteressé a fèr pèrt del projet. A la fin de mèrz fossa stat n test per poder esser touc ite: de solit se fèsc con proes a cronometer e n test atletich, chest an enveze ge volarà pissèr a soluzions desvalives, se basan coscita su la classifiches parzièles de chesta sajon.

 (dv)