La Usc di Ladins

A la Capoliveri Legend Cup Samuele Porro l’à confermà l titol de Campion Talian Marathon, jà vent l’an passà. Secondo post per na cognoscenza fascèna, Juri Ragnoli che, de gra a na bela remonta l se à piazà al secondo post dedant al sudtiroler Fabian Rabensteiner. Anter la eles enveze se à abù na neva campiona, Elena Gaddoni ruèda dant che Debora Piana e Gaia Ravaioli.

Anter i amatores, a se jièr la maia nazionèla l’era ence l fascian Gabriele Depaul. L’atlet del Team SpaceBikes l’à defat proà a se vadagnèr l titol talian te la categorìa Men Master 1. Per serèr sù i 80 chilometres l ziclist de Dèlba l’à metù 4 ores e 17 menuc, seran sù coscita te la Top-10, purampò no sul podie vadagnà da Andrea Bravin (3h52’56”), Daniele Ratto (3h58’28”) e Antonio Vigoroso (3h59’24”), i soi trei atlec a restèr sot a le 4 ores. L fascian a la fin de la garejèda l’à volù istesc ge dir develpai a sie team per l sostegn e l’à renovà l’endesfida al davegnir.

Guido Cuzzato a l’Appenninica MTB
No l’era atlec de la sociazion sportiva fascèna su l’Isola d’Elba, ma la maia bruna e neigra se à jià la 2^ edizion de l’Appenninica MTB tel dos de Guido Cuzzato. L’atlet del Fascia Bike l’à defat tout pèrt a la garejèda a tapes che se à dejout dai 27 de setember ai 3 de otober su la crestes di Apenins de l’Emilia Romagna. La garejèda se à coret te 7 tapes per n total de 450 chilometres e 16 mile metres de dislivel positif, con start a Porretta Terme (BO) e travert a Noceto (PR).

De più su La Usc 41 di 16 de otober.  (Daniele Verra)