La Usc di Ladins

Le percurs classic dla »Brixen Dolomiten Marathon« pëia ia dal Dom da Porsenú y röia cina sön la Plose. Sön chësc percurs n'él degun atlet ladin che s'á alzé fora. De bugn resultac él indere gnü arjunt tl »Ladiniatrail«, percurs cun na lunghëza de 29 km y passa 1.800 m de deslivel che piâ ia da San Martin de Tor por rové ince sön la Plose. Davagné á l'atlet da La Ila Luca Pescollderungg, dl Saysky Team cun n tëmp de 2:40.51. Al á destaché le secundo de passa 14 menüc. Al 6. post s'á plazé Roman Feichter di Gherdëina Runners che se á classifiché 2. danter i ëi cina i 40 agn. Crepaz Daniel, da San Martin de Tor, scrit ite pro le grup Atletica Gherdëina, á arjunt n bun 9. plazamënt y á davagné tla categoria U18, categoria olache al á ince garejé Nicolas Ploner da La Ila, rové 5. di U18 y 19. tla classifica generala. Giovanni Trebo da San Martin s'á plazé al 13ejim post, al 6. te süa categoria.
Pro les ëres á davagné Vronika Siebeltova (dala Republica Ceca), mo n bun plazamënt á fat l'atleta badiota Heidi Dapunt, che cun le tëmp de 4:00.47 é stada la plü asvelta dla categoria F50. Martina Colorio da Runcadic, che vir sëgn tl'Austria, á ince tut pert al Ladiniatrail, se plazan al 21. ejim post y al 8. post tla classifica F40.

»Villnöss Run«

N ater percurs dla »Brixen Dolomiten Marathon« é le »Villnöss Run«, che pëia ia da Funes, S. Madalena, por salté sura les munts cina Porsenú. L travert, do 22 km y 1.070 m de delivel, ê chiló sön plaza dl Dom. La gara é gnüda davagnada da Luca Clara di Gherdëina Runners cun n tëmp de 1:26.30. So pere, Nando, se á classifiché 18. y 4. te süa categoria M50. La terza dla familia, Chiara Clara, se á classifiché al 4. post y secunda pro les mitans U18.


Deplü podëise lí tla ediziun da en vëndres ai 9 de messé d'La Usc di Ladins.   (kp)