Do l'or concuisté d'agost a Morzine, tla Francia, s'á Luca Pescollderungg presenté ai Campionac Europeics de Spartan Race a Verbier, tla Svizera, olache al s'á plazé al secundo post, baton de dui secunc l'atlet profescionist spagnol Albert Soley. Medaia d'or por Jonathan Albon, atlet profescionist inglesc, che â dan cört tëmp davagné Ultra Trail Mont Blanc.
N resultat che despaia jö i sacrifizi
Da n ann incá se arjigna y se alenëia Luca por tó pert ai Campionac Europeics de Spartan Race y porté a ciasa tan n bun resultat é por ël na gran sodesfaziun: »I m'â tut dant da fá n bun resulat pro i Campionac Europeics. Chësc arjënt é n some che vëgn realté. Fora por l'isté ái tut pert a d'atres competiziuns, sides de Spartan Race co de trail running y i mëssi dí che tl ultim tëmp me sintii n pü' stanch; porchël é chësc resultat ciamó na maiú ligrëza: damí n'essera nia podü jí«, dij Luca cun gran emoziun. La gara se desfirâ sön n percurs de 21 km cun 1.400 m de deslivel. »Al start é düc piá ia cun n gran sbunf. Iö conësci mi corp y i sun pié ia n pü plü bel plan y tratan i pröms 3-4 chilometri êi plü zoruch. I á metü man da recuperé y al é da dí che i n'á falé gnanca un n ostacul. Albon é ruvé al travert da su. Iö y Soley se l'ún fata fora tla pert finala: chiló sunsi iö sté plü asvelt y por dui secunc sunsi gnü vize campiun europeich«, cunta Luca, che n'é nia daldöt ciamó bun da crëie che al á arjunt n te'resultat, na medaia d'arjënt europeica, che despaia jö düc i sacrifizi che al á fat ti ultims mëisc. (kp)
Arjënt europeich por Luca
Luca Pescollderungg é rové secundo pro i Campionac Europeics de Spartan Race che é stá la findledma ai 18 y 19 de setëmber a Verbier, tla Svizera
Galaria retrac
View the embedded image gallery online at:
https://www.lausc.it/sport/17136-arjent-europeich-por-luca#sigProId1185ea1d97
https://www.lausc.it/sport/17136-arjent-europeich-por-luca#sigProId1185ea1d97